Taılandtaǵy bılik pen oppozısııa arasyndaǵy qaqtyǵys jańa sıpat ala bastady.
Bangkoktyń isker ortalyǵynda birneshe jarylystar bolǵan. Onda granatametter paıdalanylǵan kórinedi. Bılik jaǵy áli de parasattylyq tanytyp, ony oppozısııa jasady dep otyrǵan joq. Qalaı bolǵanda da, munyń premer-mınıstr Abhısıt Vetchachıvanyń úkimetine qarsy áreket ekeni anyq. Sońǵy eki aptadaı ýaqytta elýge tarta dıversııalyq áreket jasalypty.
Túriktermen túsinispedi
Armenııa prezıdenti Serj Sargsıan armıan-túrik kelisiminiń qaýlylaryn parlamentte maquldaýdy toqtata turý jóninde sheshim shyǵardy. Bul qadamǵa Armenııa prezıdenti túrik jaǵy aıypty dep esepteıdi. Jyl boıy olar túrli sharttardy alǵa tosyp, eki el arasyndaǵy dıplomatııalyq qarym-qatynastyń ornyǵýyna kedergi jasap kelgen kórinedi. Olar 1915 jylǵy 24 sáýirdegi armıandarǵa qarsy jasalǵan genosıdti moıyndaǵysy joq. Sonda 1,5 mıllıondaı armıan qyrylǵany belgili. Ony armıandardyń jadynan óshire almaısyń.
Burynǵydan da soraqy
Islandııadaǵy aıtýǵa qıyn Eııafıatlaıokýdl janartaýynyń atqylaýynan týyndaǵan qıyndyq sirá uzaq ýaqyt umytylmas. Onyń ekonomıkalyq zardaby túrli jer silkinisterinen de, topan sýlardan da zor boldy. Tek Eýropanyń avıa tasymaly mıllıardtaǵan dollar shyǵynǵa batty. Al adamdardyń barar jerine jete almaı, qınalǵandary óz aldyna. Zertteýshi ǵalymdar zardap munymen bitpeıtinin aıtyp, jurtty taǵy da qorqytyp otyr. Ádette atalǵan janartaýdan keıin onyń serigi Katla oıanatyn kórinedi. Buryndary talaı ret solaı bolypty. Ǵalymdardyń aıtýynsha, onyń kúshi seriginen on ese zor kórinedi. Ol jarylsa, bir soıqan bolmaq.
Lańkesterge soqqy
Iraktyń arnaýly qyzmeti AQSh-tyń arnaýly qyzmetimen birige otyryp, atyshýly “Ál-Kaıdanyń” osy eldegi tobynyń eki basshysy Ábý Omar ál-Baǵdadı men Ábý Aıýbı ál- Masrıdıdiń kózin joıǵany habarlandy. Olardyń Tıkrıt qalasynyń mańynda tyǵylyp júrgeni anyqtalǵan soń, baǵyttalatyn zymyranmen atqylanypty. Atalǵan lańkesterdiń joıylǵanyn naqty anyqtaý úshin olardyń deneleri DNK testileýimen zerttelip, kóz jetkizilgen kórinedi. Sirá, lańkesterdiń basar jer, barar taýy qýsyrylyp bara jatsa kerek.
Qaıyrymdy baı
Dúnıe sarańǵa bitedi, baı jomart bolmaıdy degen bar. Biraq Qytaı mıllıarderi Iýı Pennıan ony joqqa shyǵardy: qozǵalmaıtyn múlik magnaty óziniń bar baılyǵyn – 1,2 mıllıard dollar kólemindegi dúnıesin qaıyrymdylyq qoryna aýdarypty. “Meniń bul qadamym eldiń basqa da aýqatty adamdaryna ónege bolar”, depti jomart jan. Kim biledi.
Kishi uldan saqtan
Soltústik Koreıanyń halqy alǵash ret Kım Chen Irdiń kishi balasy, bolashaq bılik tizginin ustaıdy degen Kım Chen Ýnnyń sýretin kórip, “qýanyshqa bólendi”. Ony eldiń bas gazeti “Nodon Sınmýn” jarııalady. Buǵan deıin ol jaıynda kóp áńgime aıtylyp, 27 jasar murager eń joǵarǵy organ – KHDR-dyń Memlekettik qorǵanys komıtetine saılansa da, qandaı sebeppen ekeni belgisiz, onyń sýreti basylmaǵan eken. Kúni keshe Qyrǵyzstan prezıdenti Bakıev kishi balasy Maksımdi bılikke ákelgende, onyń aqyry ákesin bılikten qýýǵa soqtyryp edi, munda da solaı bolmas pa eken degen áńgime aıtylyp júr.
40 jyl boıy óshpegen
Qaraqumnyń Túrkimenstanǵa qaraıtyn aımaǵynda Darvaz deıtin jerde 40 jyl boıy gaz janyp jatyr. Asa qundy otynnyń bostan bosqa janyp, ysyrap bolýy óz aldyna, ol osy mańdaǵy baılyqty ıgerýge múmkindik bermeıtin kórinedi. Ony kezinde geologııalyq barlaý jumystaryn júrgizgennen keıin, qýystarda qalǵan gazdy jaǵyp jibermek oımen, ózderi tutatqan eken, endi 40 jyl boıy ony sóndire almaı álek.
Esirtkimen elirgen
Túriktiń ataqty ánshisi Tarhanǵa esirtkini saqtaǵan jáne ony paıdalanǵan degen aıyp taǵylyp otyr. Onyń úıinen 12 gramm gashısh tabylypty. Bul úlken qylmys sanalady. Buǵan 17 adamnyń qatysy bar kórinedi. Olardyń 15-ine bes jyldan 23 jylǵa deıin jaza belgilense, Tarhannyń ózi bir-eki jylǵa bostandyǵynan aıyrý jazasyna kesilýi múmkin. Sirá, oǵan álemge tanymaldylyǵy kómektesse kerek.
Ázirlegen Mamadııar JAQYP.
