ShQO tótenshe jaǵdaılar departamenti baspasóz qyzmetiniń málimetine súıensek, bıylǵy órt qaýpi joǵary kezeń bastalǵaly beri óńirde jalpy aýmaǵy 295 gektardy sharpyǵan 16 orman órti boldy. Sondaı-aq 1291 gektarǵa jaıylǵan 50-den astam shóp janý faktisi tirkeldi.
«Kóp jaǵdaıda tilsiz jaýdyń shyǵý sebebi – halyqtyń otty abaısyz paıdalanýy, órt qoıyp umytyp ketý jáne sóndirilmegen temeki tuqyly. О́rttiń aldyn alý úshin qutqarýshylar 384 adamnan turatyn 69 mobıldi top qurdy. Olardyń quramyna jergilikti atqarýshy organdar, polısııa, azamattyq qorǵaý qyzmetkerleri men ormanshylar kiredi. Osy ýaqytqa deıin 139 ret reıd júrgizildi. Sonyń nátıjeleri boıynsha 207 adam QR ÁQBtK-niń 410 jáne 336-baptaryna sáıkes ákimshilik jaýapkershilikke tartylǵan. Qurǵaq shóp pen qoqysty órteıtinder jazasyz qalmaýy kerek. О́ıtkeni bul aýyr saldarǵa ákep soǵýy múmkin», dep habarlady vedomstvo ókilderi.
Jalyn shyqqan oshaqty birgen anyqtaý úshin qutqarýshylar kosmomonıtorıngti paıdalanady. «Geosat» JShS-men jasalǵan kelisim-shart aıasynda termonúkteler boıynsha derekterdi alýǵa múmkindik bar. Búgingi tańda ǵaryshtyq tehnologııalardyń kómegimen qutqarýshylar órttiń taralýyn talaı ret ýaqtyly anyqtap, jalyndy tez aýyzdyqtady. 2021 jylǵy 11 sáýirden bastap 176 termonúkte tirkelgen.
