Qanat qaqqan birer jyldyń ishinde aýqymdy jobanyń aımaqtardaǵy aıaq alysy jaman emes. Almatyda kópbalaly jáne az qamtylǵan otbasylarǵa arnalǵan toǵyz birdeı «Baqytty otbasy» áleýmettik ortalyǵy bar. Máselen, alyp shahardyń bir ǵana Medeý aýdanynda atalǵan baǵdarlamanyń kómegimen qanshama muqtaj jannyń baǵyt-baǵdar alǵanyn aýyz toltyryp aıtýǵa bolady. 2019 jyldyń aqpanynan bastap jumys istep kele jatqan Medeý aýdandyq «Baqytty otbasy» áleýmettik ortalyǵy kópbalaly, az qamtylǵan, tolyq emes jáne múmkindigi shekteýli balalary bar otbasylarǵa qyzmet kórsetip keledi.
«Bizdiń ortalyq áleýmettik ál-aýqaty tómen otbasylardyń balalaryn balabaqsha kezegine turǵyzý, ataýly áleýmettik kómekke tirkeý, jeke kýálikterin qalpyna keltirý, «Ońaı» kartasyna tirkelýge septesý, «Otbasy» bankine arnalǵan qujattardy jınaý máseleleri men zańdyq jáne psıhologııalyq turǵydan týyndaǵan suraqtar boıynsha kómek kórsetedi. Tek qana bul kómektermen shektelip qalmaımyz. Ortalyq tegin psıholog jáne zańger qyzmetterinen bólek, «Bıznes boıynsha keńes», tigin, massaj, uıaly telefon jáne gadjetterdi jóndeý, baý-baqsha jáne taǵy da basqa tegin kýrstardy úıretedi. Kásippen aınalysqysy keletin analardyń bıznes ıdeıasyn júzege asyryp, qarjylyq qoldaý kórsetemiz. Eger analar zańger keńesine muqtaj bolsa, bıznesti qalaı jáne neden bastaý keregin bilmese jáne otbasy taqyryptarynda ózge de saýaldar mazalasa bizdiń ortalyqqa júginýine bolady», – deıdi Medeý aýdany «Baqytty otbasy» áleýmettik ortalyǵynyń basshysy Tolqyn Sametova.
Ortalyq jetekshisi tilge tıek etkendeı, ataýly áleýmettik kómekke táýeldi bolmaı, kópbalaly analardyń kásiptik turǵydan damýyna arnalǵan tegin kýrstar men bıznes bastaý úshin grant utyp alý múmkindigi talaı janǵa úmit syılaǵan. Ortalyqta tegin bilim alyp, alǵashqy qoldaýdyń nátıjesinde óz kásibin órge dóńgeletkender az emes. Solardyń biri – Janat Serikbaeva men Aıgúl Dýsenbaeva. Tigin isi boıynsha tálim alyp, árqaısysy 2 mln teńgelik grant enshilegen qos almatylyq tize biriktirip tigin sehyn ashqan. Súıikti isinen násibin tapqan ismerler aldaǵy ýaqytta kásipteriniń aýqymyn keńeıtýdi kózdeıdi.
«Is tigýge bala kúnimnen áýestendim. Ájelerimizdiń qolynan urshyq túspeıtin. Munyń bári kóz aldymyzda qattalyp qalǵan biz, bul istiń negizgi qyr-syryn jasymyzdan boıymyzǵa sińirdik desek bolady. «Baqytty otbasy» jobasy arqyly qol jetkizgen grantymyz óz armanymyzdy iske asyrýǵa demeý boldy. Búgingi tańda atalǵan mamandyq úlken suranysqa ıe. Bizdi qoldap, qarjylaı kómek kórsetken jobaǵa alǵysymyz sheksiz. Bul shyn máninde, eńbekker analar úshin taptyrmas múmkindik», deıdi J.Serikbaeva.
Otbasy qundylyqtary turmystyq jaıttardyń tasasynda qalmas úshin analardy rýhanı qoldaý mańyzdy. Álem elderiniń ishinde ajyrasý kórsetkishi jaǵynan Qazaqstan aldyńǵy oryndardyń birinde turǵanyn aýyr da bolsa moıyndaýǵa týra keledi. Osyny eskergen ortalyq mamandary ómirine shaǵym aıtyp kelgen jandardyń kóńilin aýlap, sanasyn serpiltýge zor mán beredi. Kásibı psıhologtar, tipti tirshilikten baz keshkenin aıtyp aldaryna júgingen analarǵa moraldyq demeý berip, ortalyq arqyly jan-jaqty qoldaý kórsetken. Olardyń ishinde ortalyq kómegimen jeke bıznesin bastap, qarjylyq táýelsizdikke qol jetkizgender de bar» deıdi mamandar. Mundaǵy kompıýterlik ortalyqta túrli kýrstar júrgizilse, balalarymen kelgen analar úshin arnaıy bólmeler de qarastyrylǵan. Onda kýrs ýaqyty bitkenshe tárbıeshiler balalardy sýret salyp, jelimmen túrli pishimder jasaýǵa baýlıdy.
2019 jyly Almaty qalasynyń ákimdigi «Otbasy» bankimen birlese otyryp, kópbalaly jandar úshin «Baqytty otbasy» bıýdjettik nesıe berý baǵdarlamasyn iske qosqany málim. Baǵdarlamanyń nátıjesinde júzdegen úıelmen jeńildetilgen nesıemen úı alyp, qonys toıyn toılaǵan bolatyn.
Qysqa merzim ishinde júzege asqan joba talaı jannyń júzine shýaq syılaǵany qýantady. Aldaǵy ýaqytta mundaı naǵyz qajetti baǵdarlamanyń aýqymy keńeıtilip, shalǵaı aımaqtardaǵy kásibı mamandardyń keńesine zárý bolyp otyrǵan jandarǵa da qamqorlyq kórsetilse quba-qup.
ALMATY
