Qaraǵandy kómir baıytý fabrıkasynyń qurylysy byltyr qyrkúıek aıynda bastalsa da, búginde Qaz Carbon JShS saǵatyna 300 tonnaǵa deıin joǵary synypty kómir konsentratyn óndiredi. Kásiporyn shıkizattyń jalpy taý-ken massasynan paıdaly qazbany barynsha shyǵarýdy júzege asyrýǵa múmkindik beretin biregeı tehnologııanyń nátıjesinde kiris kúli 15%-dan ózindik kúli 2-3%-ǵa deıingi kómirdi baıyta alady. Búkil prosess hımııalyq reagentterdi jáne sýdy tazartý basseınderi úshin úlken alańdardy qoldanbastan jabyq sıklde júredi. Bul óz kezeginde qorshaǵan ortaǵa keri áserdi tómendetip, óndiris ýaqyty men shyǵyndaryn azaıtady, nátıjesinde daıyn ónimniń ózindik qunyna áser etedi.
«Daıyn ónimniń sapasy men óndiristiń tehnologııalylyǵyn saqtaýdy baqylaý tolyǵymen avtomattandyrylǵan jáne óndiristi basqarý ortalyǵynyń operatory arqyly júzege asyrylady. Bul bizge Qaraǵandy fabrıkasy kómir konsentratynyń barlyq qoldanystaǵy halyqaralyq standarttarǵa sáıkestigi týraly nyq senimmen aıtýǵa múmkindik beredi. Kásiporyn nólden bastap quryldy. Bul joǵary nátıjelerge qol jetkizý úshin eń az nıýansty eskerýge múmkindik berdi. Bizdiń konsentrat sapaly, ózindik qunynyń tómendigi jáne jyldam jetkizý arqyly organıkalyq energııa tasymaldaýshylardyń halyqaralyq naryǵynda básekege qabiletti», dedi Qaz Carbon JShS aksıoneri Erlan Nyǵmatýlın.
Jobanyń jalpy quny, sonyń ishinde baıytý fabrıkasyn salýǵa jáne iske qosýǵa, sondaı-aq qoldanystaǵy quıý óndirisin jańǵyrtýǵa baılanysty quny 12 mlrd teńgeni, Qazaqstannyń damý bankiniń qatysýy 9 mlrd teńgeni, qalǵan qarajat Qaz Carbon JShS-nyń menshikti qatysýyn qurady.
Shıkizattyń negizgi jetkizýshileri – jergilikti kómir kásiporyndary. Daıyn ónimniń negizgi tutynýshysy – YDD Corporation JShS Qaraǵandy ferroqorytpa zaýyty. Alaıda baıytý fabrıkasy óńirdiń eksporttyq geografııasyn belsendi túrde keńeıtýdi josparlap otyr, ıaǵnı Qaraǵandy kómir konsentratynyń edáýir bóligi eksportqa jiberiledi.
«QDB qaryz qarajaty Indýstrııalyq-ınnovasııalyq damýdyń memlekettik baǵdarlamasy sheńberinde berildi. О́ıtkeni joba eksporttyq áleýetti keńeıtýge, qazaqstandyq óńdeý sektoryn damytýǵa jáne ımporttyń ornyn basýǵa, sondaı-aq Qaraǵandy óńiriniń áleýmettik-ekonomıkalyq jaǵdaıyn arttyrýǵa baǵyttalǵan. Qaz Carbon JShS – álemdegi turaqsyz ekonomıkalyq jáne epıdemııalyq jaǵdaıǵa qaramastan, fabrıkany qysqa merzimde, ıaǵnı 7 aı ishinde iske qosyp, óńirde 100-den astam turaqty jumys ornyn qura alǵan mańyzdy seriktes. QDB komandasynyń atynan kásiporyndy jumystyń bastalýymen quttyqtaımyn jáne tabys tileımin», dedi QDB basqarma tóraǵasy Abaı Sarqulov.
Qaz Carbon JShS aksıoneri Devıd Kemertelıdzeniń aıtýynsha, kómir baıytý zaýytyn salý jobasyn júzege asyrý kásiporyn komandasynyń úılesimdi jumysynyń, sondaı-aq quryltaıshylardyń Qazaqstanda iri ınvestısııalyq jobalardy iske asyrýdaǵy mol tájirıbesiniń nátıjesinde bir jylǵa jýyq ýaqyt ishinde iske asyryldy.
«Biz úshin bul Qazaqstandaǵy alǵashqy joba emes. Budan buryn da osyndaı aýqymdaǵy ónerkásiptik obektilerdi iske qostyq jáne eldiń qosylǵan quny joǵary ónimdi jasaý úshin úlken shıkizat bazasyna, biregeı ınvestısııalyq ahýalǵa, ulttyq damý ınstıtýttary atynan memleket tarapynan qoldaýǵa kóz jetkizdik. Osynyń bári Qaraǵandyda óńirdi óndiristik kóshbasshylarǵa shyǵara alatyn taǵy bir joǵary deńgeıdegi zaýyttyń paıda bolýyna yqpal etti», dedi kásiporyn aksıoneri.
Aıta ketelik, el bıýdjetine quıylatyn salyqtyń boljamdy túsimi 300 mln teńgeni, eńbek ónimdiligi bir adamǵa 8 mln teńgeni quraıdy.
