Tramptyń jospary boıynsha monýmentte AQSh-tyń burynǵy prezıdentteri, sport juldyzdary men mádenıet qaıratkerleri beınelenbek edi. Ol «buryn-sońdy ómir súrgen zańǵar amerıkalyqtardyń úlken parkin» jasaqtaýdy maqsat etken-di. О́zi 30 adamnan turatyn tizim usyndy. Onda Devı Krokett, Bıllı Graıam, Ýıtnı Hıýston, Harrıet Týbman men Antonın Skalıa da bar. Osy rette tizimge Kongrestiń músheleri kirmegenin eskergen jón. Al Kongress bolsa, bul monýmentti qarjylandyrmaıtynyn jetkizdi.
«Osylaısha, biz Amerıka patrıottaryn tárbıeleımiz. Amerıka tarıhynyń taǵy bir bólimin jazamyz. Sonymen birge balalarymyzǵa ańyzdar jerinde ómir súretinin, olardy eshteńe toqtatpaıtynyn, eshkim qarsy kele almaıtynyn úıretemiz», degen edi Tramp.
Eskertkishte burynǵy prezıdentterge, AQSh-ty qarjylandyrýǵa kómekteskenderge basymdyq beriletini aıtylǵan. «Eshkim minsiz ómir súrmeıdi. Degenmen, barlyǵymyz qoshemetke, syılaýǵa, zertteý men eske alýǵa laıyqpyz», degen pikir bildirgen-di burynǵy prezıdent.
Baıden bolsa, Tramptyń bir jyl buryn Ádilet mınıstrligi men Federaldyq saýda komıssııasyna bergen áleýmettik jelini baqylaý tapsyrmasynyń da kúshin joıdy. Bul tapsyrma Tramptyń ózi Twitter, Facebook sııaqty áleýmettik jelilerden alystatylǵannan keıin berildi.
«Meniń ákimshiligim sapany, qoljetimdi densaýlyq saqtaý júıesin qurýdy maqsat etedi. Bul maqsatqa sheteldikterdiń kirýine tyıym salmaı-aq jete alamyz», dedi Baıden.
