Bıyl qasıetti Ramazan aıynda belsendi jastar asar ádisimen altynshy baspana qurylysyna kirisip, ony bir aı ishinde tolyq aıaqtady. Jastar uıǵarymymen bul úı múmkindigi shekteýli uly men qyzyn jalǵyz tárbıelep otyrǵan Ásel Buqarbaevaǵa buıyrdy. Onyń kiltin tabystaýǵa aýdan ákimi Rýslan Rústemov qatysyp, izgilikti is jasaǵan eriktilerge el alǵysyn jetkizdi.
– Jastardyń qoǵamǵa degen qamqorlyǵy árkimdi de qýantady. Eldiń áleýmettik jaǵdaıyna janashyrlyq tanytyp, qınalǵanǵa qamqor bolǵan keıingi býynnyń bul isi kópke úlgi bolary anyq. Raqymy mol Ramazan aıynda jasaǵan qaıyrymdy isterińizge búkil aýdan halqynyń atynan alǵys bildiremin, – dedi aýdan basshysy.
Halyqaralyq otbasy kúninde uıymdastyrylǵan is-sharada jastar jaqsy iske aýdan kásipkerleri, el azamattary da kóp úles qosyp kele jatqanyn aıtyp ótti.
–Baspana salynyp bolǵannan keıin qor komıssııasy 4-5 shańyraqtyń jaǵdaıymen muqııat tanysyp shyqty. Jan-jaqty saralaı kele osy otbasyna toqtadyq, – deıdi qor múshesi Ábdisamat Ábish. – On jyldan beri páter jaldap kele jatqan Ásel Buqarbaevany, onyń múmkindigi shekteýli eki balasyn osylaısha qýantqymyz keldi. Bul kisiniń kómek bere qoıatyn aǵaıyndary da joq ekendigin eskerdik.
«Jańarǵan jastary» qoǵamdyq qory ári qaraı da qaıyrymdylyq isterdi jalǵastyrýdy kózdep otyr.
Qyzylorda oblysy
