Bıznes jáne qarjy salasynda analıtıka jasaýmen aınalysatyn Finprom aımaqtar arasynda sıfrly saýattylyq boıynsha aıyrmashylyq jer men kókteı dep jazady. Tórt oblystyń sıfrly saýattylyǵy josparlanǵan mejege de jetpeı qalǵan. Degenmen jalpylama alǵanda ósý bar. «Sıfrly Qazaqstan» memlekettik baǵdarlamasynyń basty mindeti 2022 jyly halyqtyń sıfrly saýattylyǵyn 83 paıyzǵa jetkizý bolatyn. 2020 jyly 6-74 jas aralyǵyndaǵy azamattardyń saýattylyǵy 84,1 paıyzǵa jetken. Al tómen nátıje kórsetken óńirler – Aqmola (74,9 paıyz), Soltústik Qazaqstan, Batys Qazaqstan (78,8 paıyz) jáne Mańǵystaý oblystary (79,6 paıyz). О́zge óńirlerdegi sıfrly saýattylyq deńgeıi 80,9 paıyz ben 91,4 paıyz aralyǵynda.
Árıne, sıfrly saýattylyq damý úshin de ınternetke qoljetimdilik kerek. Sıfrly damý, ınnovasııa jáne aeroǵarysh ónerkásibi mınıstri Baǵdat Mýsınniń aıtýynsha, DigitEL ulttyq jobasy qazaqstandyqtardy ınternetpen 100 paıyz qamtyp qana qoımaı, IT salaǵa keletin ınvestısııa kólemin de arttyrady.
«DigitEL ulttyq jobasy bes baǵyt boıynsha 200 sharany qarastyrady. 2021-2025 jyldary jobanyń júzege asý nátıjesinde halyqty ınternetpen, densaýlyqtyń elektrondy pasportymen 100 paıyz qamtý, IT salaǵa keletin ınvestısııany jylyna 500 mlrd teńgege, IT ónimder men qyzmetteriniń eksport kólemin 500 mln dollarǵa, elektrondy ónerkásip óndirisi kólemin 90 mlrd teńgege deıin arttyryp, 100 myń jumys ornyn quryp, óńirlerde 5 IT mektep ashý kózdelgen» degen edi mınıstr.
