8 mamyrda Qarabalyq aýdanynyń ortalyǵyndaǵy «Detal» avtodúkeniniń janynda «Lada Largýs» avtokóliginiń qozǵaltqyshynan órt shyqsa, kelesi kúni dál osy aýdandaǵy Naýka aýylynda «Lada Kalına» avtokóligi órtendi. Sondaı-aq Rýdnyı qalasynda 9 mamyrda «Audi-80» kóligi, 14 mamyr kúni «Volga» kóligi otqa orandy.
«Eski kólikter tehnıkany paıdalaný barysynda órt qaýipsizdigi erejeleriniń saqtalmaýynan, tehnıkalyq qyzmetten ýaqtyly jáne tolyq ótpegendikten órtenedi», deıdi oblystyq tótenshe jaǵdaı departamentiniń mamandary.
Osyndaı oqıǵalardyń aldyn alý maqsatynda oblysta avtokólikterdegi órt qaýipsizdigi aılyǵy bastaldy. 17 mamyrdan 17 maýsymǵa deıin jalǵasatyn qaýipsizdik sharasy aıasynda TJ departamenti mamandary arnaıy reıdtter uıymdastyryp, kólik júrgizýshilerge órt qaýipsizdigi jáne alǵashqy órt sóndirý quraldaryn paıdalaný erejelerin túsindiredi.
О́rt sóndirýshilerdiń sózinshe, avtokólik órti tez údeıdi. Sondyqtan júrgizýshiler men jolaýshylarǵa úlken qaýip týdyrýy múmkin. Kez kelgen kóliktiń ishi negizinen elektr jabdyqtary men tez tutanatyn sıntetıkalyq qaptamadan turady. Olar órt tıgen jaǵdaıda kóp mólsherde ýly gaz shyǵarady. Sondyqtan ár avtokólikte mindetti túrde órt sóndirgish qural bolýy kerek jáne ol kez kelgen jaǵdaıda paıdalanýǵa jaramdy bolýy tıis.
