26 maýsymda AQSh-tyń Las-Vegas qalasynda ótetin jarysta qandasymyz jergilikti boksshy Rob Brantpen judyryqtasady. 30 jastaǵy Tehas shtatanyń týmasy 2012 jyldan beri kásipqoı rıngte óner kórsetýde. Sol aralyqta 27 kezdesý ótkizip, 25 ret jeńiske jetti. 17 qarsylasyn nokaýtqa jiberdi. 2018 jyldyń 20 qazanynda ol óz otanynda ótken boks keshinde Japonııanyń juldyzy Rıota Mýratany upaı sanymen utyp, WBA nusqasy boıynsha chempıondyq ataqty ıelendi. 2019 jyldyń 12 aqpanynda reseılik Hasan Baısangýrovtan basym tússe, sol jyldyń 12 shildesinde Mýratamen qaıta kezdesti. Bul básekede jeńilistiń kermek dámin tatqan Brant altyn belbeýden aıyryldy.
Áýesqoılar arasynda álem jáne qurlyq chempıony, Azııa oıyndarynyń jeńimpazy degen ataǵy bar Jánibek Álimhanuly kásipqoı boksty serik etkeli bes jylǵa jýyqtap qaldy. Sol kezden beri toǵyz ret rıngke kóterilgen qazaq jigiti barlyq jekpe-jekti óz paıdasyna sheshti. Bes qarsylasyn esinen tandyrdy.
Al 26 maýsymda Las-Vegasta ótetin boks keshiniń basty básekesinde ýkraınalyq Vasılıı Lomachenko (14-2, 10 KO) men japonııalyq Masaeshı Nakatanı (19-1, 13 KO) qolǵap túıistiredi.
