«Taraz» kósh sońyndaǵy «Jetisýdan» oıda-joqta jeńilip qaldy. 2-mınýtta Pedro Eýjenıo gol soqqanymen, arada týra jarty saǵat ótkennen soń Artem Dmıtrıev tarazy basyn teńseltti. Komandalar úzilisten shyqqan bette Berik Shaıhov dopty óz qaqpasyna engizdi. 70-mınýtta Baýyrjan Baıtana esepti teńestirdi. Biraq jergilikti jankúıerlerdiń qýanyshy uzaqqa sozylmady. 72-mınýtta Aıbar Jasylyqov soqqan gol «Jetisýǵa» jeńis syılady – 2:3.
«Kaspıı» men «Shahter» arasyndaǵy básekeniń taǵdyry alǵashqy taımda sheshildi. Alań ıeleri sapyndaǵy Davıd Karaev eki márte (2 jáne 31-mınýttar) jáne Salı bir ret (9-mınýt) dopty torda týlatty. Qonaqtar birde-bir nátıjeli shabýyl uıymdastyra almady – 3:0.
Qostanaıda «Tobyl» «Qyzyljardy» 2:0 esebimen utty. Bul goldardyń avtorlary – Nemanıa Nıkolıch (64 mınýt) pen Serikjan Mujyqov (77 mınýt). Al «Atyraý» men «Ordabasy» arasyndaǵy matchta esep ashylǵan joq – 0:0.
Jarys kestesinde «Astana» áli de eshkimdi jetkizbeı keledi. Elordalyq klýbtyń enshisinde 32 upaı bar. Ekinshi orynda – «Tobyl». Qostanaılyqtar 25 upaıdy oljalaýda. «Aqjaıyq» úshinshi satyǵa jaıǵasty. Oraldyqtardyń 21 upaıy bar.
