19 mamyrdaǵy málimet boıynsha 36 617 adam koronavırýs ınfeksııasynan emdelip jatyr. Olardyń ishinde 13 452 naýqas stasıonarda, 23 165 naýqas ambýlatorııalyq deńgeıde em qabyldaýda. Indetke shaldyqqandardyń arasynda 761 adamnyń jaǵdaıy aýyr, 185 naýqastyń jaǵdaıy óte aýyr, 110 naýqas О́JJ apparatynda jatyr.
Vaksına saldyrtqandardyń jalpy sany 1 898 604 adam bolsa, onyń ishinde 802 090 adam vaksınanyń ekinshi komponentin alǵan. Osy rette Densaýlyq saqtaý birinshi vıse-mınıstri Marat Shoranov vaksınalaý qarqyny báseńdegenin rastady.
– Sáýir aıynda vaksınalaý qarqyny táýligine 100 myńnan asty. Búgingi tańda bir kúnde vaksına alǵan adamdardyń sany 30 myń men 60 myń aralyǵynda bolyp jatyr. Biraq birinshi kezektegi mindet – halyqty vaksınalaý múmkindigin qamtamasyz etý. Qazir vaksınalaý kezindegi halyqtyń belsendiligi tómendep jatqanyn kórip otyrmyz. Bul, eń aldymen, mamyr aıyndaǵy mereke kúnderiniń kóp bolǵanymen baılanysty shyǵar. Biz halyqtyń kúmáni seıilip, osynaý el úshin asa mańyzdy sharaǵa belsendi qatysady dep úmittenemiz, – dedi M.Shoranov
Sonymen qatar ol vaksına saldyrǵandardyń ishinde sozylmaly aýrýy bar naýqastar men 65 jastan asqan adamdardyń úlesi qansha ekenin atap ótti.
– Qazir dıspanserlik naýqastar tobyna jatatyn adamdardyń ishinde sozylmaly aýrýy bar naýqastardyń
4%-ǵa jýyǵy vaksına aldy. Mınıstrlik óńirlerdegi ahýaldy baqylaı otyryp, aldaǵy ýaqytta vaksına alýǵa qarsy medısınalyq kórsetilim bolmaǵan jaǵdaıda sozylmaly aýrýy barlardy da vaksına saldyrýǵa shaqyrýdy josparlaýda. Sondaı-aq 250 myńnan asa jasy 65 jastan asqan adam vaksına saldyrdy, – dedi vıse-mınıstr.
Jalpy, el arasynda koronavırýsqa baılanysty neshe túrli alypqashpa áńgimeniń taraǵany belgili. Sonyń birin M.Shoranov joqqa shyǵaryp, amerıkalyq ǵalymdardyń Qazaqstanda indetten 80 myń adam qaıtys boldy degen deregi asyra kórsetilgenin aıtty.
– Shynymen de Medısınalyq kórsetilimder jáne baǵalaý ınstıtýty (AQSh) ǵalymdarynyń ólim-jitim týraly habarlamasy boldy. Olar koronavırýs pandemııasy kezeńinde qosylǵan ólim-jitimder boıynsha gıpotezaǵa testileý júrgizgen. Ǵalymdar ózderiniń jumysynda málimetterdi óńdeýdiń túrli ádisterin qoldanatynyn, derekter negizinde «teorııalyq gıpoteza» túzetinin túsinemiz. Alaıda búginde ony tekserý múmkin emes. Eń aldymen atalǵan ınstıtýttan Qazaqstanǵa da, Densaýlyq saqtaý mınıstrligine de saýal kelip túspegenin atap ótkim keledi. Tolyqtaı alǵanda, zertteýdiń búkil álem osy problemamen betpe-bet kelgeni týraly aıtqanymen kelisýge bolady jáne qosylǵan ólim-jitim bizdiń elge ǵana emes, barlyq tipti damyǵan memleketterge de tán. Atalǵan zertteýdegi elimizde bir jyldyń ishinde shamamen 80 myń ólim-jitim qosyldy delingen derek tym asyra kórsetilgen. Bizdiń málimetterge sáıkes, ótken jyly shamamen 28 200 jaǵdaı tirkeldi, – dedi M.Shoranov.
Bul rette Densaýlyq saqtaý vıse-mınıstri Ajar Ǵınııat ótken jyly koronavırýs ınfeksııasynan bolǵan ólim-jitimge qatysty naqty derekti atap kórsetti.
– Osy jyldyń naýryzynyń sońyna deıin jyl saıyn óńirlerden kelip túsetin jyldyq esepterdiń, sonymen qatar Ulttyq statıstıka bıýrosynyń qorytyndysy boıynsha ólim týraly kýálikti azamattardyń hal-aktilerine kesh tirkeýdiń barlyq jaǵdaıy eskerildi. Mınıstrlik Ulttyq statıstıka bıýrosymen birge barlyq statıstıkalyq derekti salystyryp tekserip shyqty. О́tken jyly koronavırýs ınfeksııasynan ólim-jitimge qatysty naqty derek 4 729 adamdy quraıdy. Onyń ishinde koronavırýs ınfeksııasynan qaıtys bolǵany anyq, birizdendirilgeni – 1 783 adam, al indetten kóz jumǵany naqtylanbaǵany – 2 946 adam, – dedi A.Ǵınııat.
Vaksınaǵa degen halyqtyń kúdigin kúsheıtetin birden-bir jaıt – vaksına alǵan adamdardyń koronavırýspen aýyryp qalýy. Buǵan qatysty Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova túsinikteme berdi.
– Biz vaksınalaýdyń birinshi komponentinen keıin de, ekinshisinen keıin de syrqattaný jaǵdaılaryna mindetti túrde monıtorıng júrgizemiz. Jalpy, elimiz boıynsha birinshi komponentten keıin aýrýdyń 541 jaǵdaıy tirkeldi. Ekinshi komponentten keıin 104 jaǵdaı boldy. Ádette, bul adamdardyń barlyǵy ınkýbasııa kezeńinde, ıaǵnı 14 kúnniń ishinde aýyrǵan. Budan adamdardyń vaksına saldyrmaı turyp aýrý juqtyrǵany kórinedi, – dedi A.Esmaǵambetova.
Sonymen qatar vaksınalaýdyń aralyǵy, keıbir vaksına túriniń jetispeýshiligi sııaqty máseleler jıi qozǵalady. Brıfıng barysynda Almatyda otandyq vaksınanyń jetispeı jatqany sóz boldy. Bul saýalǵa jaýap bergen A.Esmaǵambetova QazVac vaksınasy áli qoljetimdi ekenin alǵa tartty.
Onyń aıtýynsha, otandyq QazVac vaksınasynyń 50 myń dozasy búkil el boıynsha úlestirildi. Bul 25 myń adamǵa eseptelgen. Almatyǵa 6 myń doza jetkizildi, ıaǵnı 3 myń adamǵa eseptelgen. Sońǵy málimetter boıynsha búgingi tańda bul qalada 2 800 adam vaksınalanǵan, QazVac-tyń áli 200 dozasy bar.
– Búginde keıbir óńirlerde QazVac, al barlyq óńirde Hayat-Vah jáne Spýtnık-V vaksınalary qoljetimdi. Eger azamattar QazVac vaksınasyn saldyrǵysy kelse, onda, árıne, ekinshi partııanyń túsýin kútýge týra keledi. Biraq Qazaqstanda qoldanylatyn barlyq úsh vaksına da tıimdi jáne qaýipsiz ekenin eske salǵym keledi. Qandaı da bolsyn bir vaksınany kútý týraly sheshim qabyldaǵanda, vırýs aınalymy áli de toqtamaǵanyn esten shyǵarmaǵanymyz jón. Ony toqtatý úshin tez arada ujymdyq ımmýnıtet qalyptastyrýymyz kerek, barynsha kóp azamat ekpe saldyrýy tıis. Sondyqtan azamattardy Pfizer nemese QazVac ekpeleriniń qashan túsetinin kútpeı, qolda bar jáne qoljetimdi vaksınany saldyrýǵa shaqyramyn, – dedi A.Esmaǵambetova.
QazVac – 21 kúndik aralyqpen salynatyn birdeı eki dozaly vaksına. Ekpe komponentin alý aralyǵynyń ózgerýi tek Spýtnık-V vaksınasyna ǵana qatysty. QazVac jáne Hayat-Vah boıynsha aralyqtar ózgergen joq.
