Resmı málimet boıynsha, 18 mamyrda Qostanaı qalasynda – 15, Rýdnyıda – 4, Arqalyqta 3 adam koronovırýs juqtyrǵan. Qalǵan aýdandarda birdi-ekili naýqastan ǵana tirkelip tur. Jalpy pandemııa bastalǵaly oblysta koronovırýspen aýyrǵan 15 226 adam tirkelip, 14 542 naýqas emdelip shyqty.
Osy aıdyń basynda oblysqa arab elderinde keń qoldanysqa ıe bolǵan qytaılyq «Haıat vak» vaksınasy ákelingen. Bul vaksına Mysyr, Argentına, Perý, Bahreın, Birikken Arab Ámirlikterinde qoldanylady eken. Dárigerler «Haıat vaktyń» kóptegen artyqshylyǵy bar ekenin aıtyp otyr. Mysaly, ary-beri tasymaldaýǵa, saqtaýǵa qolaıly kórinedi. Alystan jetken vaksınany qostanaılyqtar da belsendi qabyldaı bastady. Máselen, oblys ortalyǵyndaǵy №1 emhananyń ózinde ǵana 300-ge jýyq adam dál osy vaksınany ektirgen. Olardyń qatarynda medısına qyzmetkerleri de bar.
– Koronavırýspen ózim de aýyrdym. 30 mamyrdan 1 maýsymǵa deıin dene qyzýym 40 gradýstan tómen túspeı qoıdy. 8 kún boıy ınfeksııalyq aýrýhanada jattym. Áriptesterimniń kómegimen janym ázer qaldy, jetinshi kún degende baryp qyzýym ornyna tústi. Taldaý qorytyndysy pnevmonııa ekenimdi rastady. Bul sozylmaly aýrý ǵoı. Jumysta júrgende aýa arqyly juqtyryp alsam kerek. Emdelip shyqqan soń, biraz ýaqyt ótkizip baryp osy vaksınanyń birinshi komponentin qabyldadym. Qorqatyn túgi joq, meniń oıymsha, bul jaqsy vaksına, – dedi B.Halıkova.
Jalpy, osy jyldyń sońyna deıin óńir turǵyndarynyń 72%-yn, ıaǵnı 365 myńnan astam adamǵa ekpe jasaý josparlap otyr. Qazir oblys aýmaǵynda 31 medısınalyq mekemede ekpe kabınetteri jumys istep jatyr. Keıbir iri kásiporyndardyń jumysshylaryn óndiris basynda vaksınalaý úshin kóshpeli brıgadalar uıymdastyrylýda. Aldaǵy ýaqytta aýyl turǵyndaryn vaksınalaý maqsatynda shalǵaı eldi mekenderge de jyljymaly medısınalyq keshender shyǵatyn bolady.
