Degenmen oblystyq densaýlyq saqtaý basqarmasynyń basshysy Ashan Baıdýálıevtyń málimetinshe, munaıly óńirde vaksına dozalary jetkilikti deýge negiz bar. Sonyń bir dálelindeı, 18 mamyrda Aqtóbedegi farmasevtıka habynan Spýtnık V vaksınasynyń II komponentine arnalǵan 7 650 doza jetkizildi. Vaksına dozalaryn egý beketterine bólý men tasymaldaý qolǵa alyndy. Qazir óńirde 41 ekpe beketi jumys isteıdi. Onyń ekeýi Teńiz ken ornynda bolsa, HQKO-da, «Tamasha», «Kóktem», «Atyraý», «Baızar», «Dına» saýda ortalyqtarynyń árqaısysynda bir-birden ekpe beketi ashyldy. Budan basqa, qalalyq, aýdandyq emhanalar janynda 23, sondaı-aq 10 jyljymaly bekette turǵyndarǵa vaksına salynady.
Turǵyndardyń vaksına saldyrýǵa nıetiniń tómendiginen bolar, ásirese, Atyraý qalasynda qaýipti vırýsty juqtyrý azaıar emes. Máselen, 18 mamyrdaǵy derekke júginsek, munaıly shahar turǵyndary arasynan 56 adam koronavırýstyń «qaqpanyna» túsip otyr. Sondaı-aq Jylyoı, Qurmanǵazy men Mahambet aýdanynan 8 turǵyn atalǵan indetti juqtyrdy. Al Jylyoı aýdanyndaǵy Teńiz kenishinde qaýipti vırýsqa eki jumysshy ǵana shaldyǵypty. Demek ótken jylǵydaı emes, munda indetti juqtyrǵandar sany birtindep azaıyp keledi. Buǵan kenishtegi jumysshylardyń vaksınany mezgilinde saldyrýynyń oń áseri tıgeni daýsyz.
О́ńirdegi aýrýhanalarda 12 kompıýterlik tomografııa, 4 MRT, 41 rentgen, 267 ókpeni jasandy jeldetý apparaty, 669 ottegi konsentraty, 1 514 ımpýlstik oksımetri men 8 ottegi stansasy bar. Úsh kún buryn oblys ortalyǵynan shalǵaıdaǵy Qurmanǵazy aýdandyq aýrýhanasy kompıýterlik tomografııamen qamtyldy. Quny 360 mln teńgelik kompıýterlik tomografııa Kaspıı qubyr konsorsıýmynyń demeýshiligimen satyp alynypty.
– Japondyq Hitachi kompanııasy shyǵarǵan medısınalyq apparattyń SUPRIA modeli adam denesin tolyq dıagnostıkalaýdy qamtamasyz etetin 128 bólimdi skanerden ótkizedi. Radıasııalyq júktemeni azaıtý úshin IntelliEC dozasyn ıntellektýaldy qaıta bólý algorıtmi men IntelliIP ıterasııasynyń zamanaýı ádisi qoldanylady. Bul vızýalızasııa sapasyn joǵaltpaı, dozalardyń eń tómen mánderimen zertteýler júrgizýge múmkindik beredi, – deıdi basqarma basshysy.
