Jaqynda Kazakh Tourism ulttyq kompanııasy men Mental HR Consultancy túrik kompanııasy salanyń kásibı mamandaryn daıarlaý jáne eńbek resýrstarynyń básekege qabilettiligin arttyrý máseleleri boıynsha yntymaqtastyq týraly memorandýmǵa qol qoıdy. «Naryqta bilikti kadrlar tapshylyǵy oryn alsa, ásirese kásibı daıyndalǵan jelilik qyzmetkerler bolmaǵan kezde, týrızmdi sapaly damytý múmkin emes», dedi Ulttyq kompanııanyń basqarma tóraǵasy Erjan Erkinbaev.
Týrızmdi qarqyndy damytý úshin eki negizgi quramdas bólik bar. Birinshisi – ınfraqurylym men kommýnıkasııa. 2019 jyly qabyldanǵan týrıstik salany damytýǵa arnalǵan memlekettik baǵdarlama aıasynda búginge deıin jalpy somasy 61,1 mlrd teńge quraıtyn 55 joba iske asyryldy. Ekinshisi – salanyń quzyreti. Memleket tarapynan Mádenıet jáne sport mınıstrligi kadrlyq áleýetti damytý máselelerine úlken kóńil bólip keledi. Mamandar daıarlaıtyn alǵashqy beıindik Halyqaralyq týrızm jáne qonaqjaılyq ýnıversıteti ashylǵany belgili.
«Byltyr qolǵa alǵan academy.tourismonline.kz jobasy óziniń tıimdiligin dáleldegenin atap ótkim keledi. Týrızm salasy týraly onlaın dáris alǵysy keletin kez kelgen adam sapaly teorııalyq daıyndyqtan óte alady. Bıyl biz kásibı spıkerlerdi kóptep tarta otyryp, jańa oqytý modýlderin jasaýdy jalǵastyramyz. Sondaı-aq osy jyly biz óńirlik oqý oryndarynyń bazasynda Mańǵystaý týrızm salasy úshin jergilikti turǵyndar qatarynan jelilik 1500 adamdy oqytý boıynsha synamaly jobany iske asyrýdy josparlap otyrmyz», dedi Erjan Erkinbaev.
Mental HR Consultancy túrik kompanııasy bıznes sýbektileri men Qazaqstan Respýblıkasynyń memlekettik organdarynyń jelilik jáne basqarý qyzmetkerlerin oqytý máselelerinen basqa, ınvestısııalar tartý jáne týrıstik sektordy sıfrlandyrý sııaqty baǵyttar boıynsha jumys isteıdi.
