Is-sharada sóz alǵan A.Aımaǵambetov: «Dúnıejúzinde bolyp jatqan indetke qaramastan bilim shyńyn baǵyndyryp, elimizdiń namysyn qorǵap júrgen jastardy maqtan tutamyn. Bul – úlken jetistik. Osy oraıda oqýshylardy ıntellektýaldyq saıysqa daıyndap, bilimin shyńdaýǵa kómektesken pedagogterge, osyndaı daryndy balalardy tárbıelep, muǵalimdermen birdeı baptap júrgen ata-analarǵa alǵys aıtamyn. Olardyń eńbegi óte zor. Biz osy olımpıadany uıymdastyrý kezinde de ashyqtyq pen ádildikti qamtamasyz etýdi jalǵastyrdyq. Olımpıadanyń sońǵy kezeńi kompıýterlik formatta ótti. Adaldyq qaǵıdalaryn aldaǵy olımpıadalardyń barlyq kezeńinde saqtaýdy qolǵa alamyz», dedi.
Elordadaǵy №17 mektep-gımnazııasynyń 10-synyp oqýshysy Sara Okenova respýblıkalyq olımpıadada fransýz tili boıynsha qola medal ıelendi.
«Kóp qatarlastarym aǵylshyn tilin tańdaıdy. Sondyqtan pándik olımpıadada oǵan básekelestik joǵary. Alaıda men fransýz tilin mektebimniń talabyna baılanysty oqydym. 3 jyldaı buryn Almatydan aýysyp kelgenimde, jańa oqý ordamda fransýz tilin oqytatynyn bildim. Áýelde kóp qınaldym, qosymsha sabaqqa bardym. Bastapqyda eń bolmasa úlgerimimdi jaqsartyp, synyptastaryma ilesý, baǵdarlamadan qalyp qoımaýdy kózdegen edim», deıdi qola medal ıegeri.
S.Okenovanyń oıynsha, jańa daǵdyny úırenýge kóp ýaqyttyń qajeti joq, ynta bolsa bolǵany. Máselen, ol osy jetistikke 2,5 jylda jetip otyr. Al bolashaqta fransýz tilin jetik meńgerip, joǵary bilimdi Fransııadan almaq.
Aıta keteıik, respýblıkalyq olımpıada bıylǵy oqý jylynda tórt kezeńde ótti. Mektep kezeńine 1 mln-ǵa jýyq bala qatyssa, qorytyndy kezeńde 1 582 oqýshy baq synady. Olımpıada qorytyndysy boıynsha 685 qatysýshy jeńimpaz jáne júldeger atandy. 122 qatysýshy altyn medalǵa, 214-i kúmis jáne 349 qatysýshy qola medalǵa ıe boldy. Oqýshylar olımpıadaǵa jáne mınıstrdiń marapattaý rásimine óz óńirlerinde otyryp qatysty.
