Jalpy, atalǵan mereke 1977 jyly Halyqaralyq mýzeıler keńesiniń Bas konferensııasynda bekitilgen eken. Al «Mýzeı túni» sharasy 1997 jyly tuńǵysh ret Germanııanyń Berlın qalasynda ótken. Ýaqyt óte kele bul ıgi dástúr elimizde de jalǵasty. Qazirgi kezdegi karantın talaptaryna baılanysty Áýlıeata jerindegi bul shara bıyl onlaın formatta ótti. Tarazdyq jurtshylyq mýzeı túnin túrli áleýmettik jeliler arqyly tamashalady. Dástúrli «Mýzeıdegi tún» aksııasy oblys ortalyǵyndaǵy «Tórtkúl» kerýen saraıynan bastaý alyp, oblystyq tarıhı-ólketaný mýzeıinde órbidi. Áýeli ashyq aspan astynda «Kóne Tarazdyń qundy jádigerleri» atty arheologııalyq, «Kıeli Qazaqstan» atty kollaj túrindegi jáne «Taraz – tarıhtyń altyn dińgegi» atty sýretshiler men qolóner sheberleriniń kórmeleri qoıyldy. Sondaı-aq kópshilik nazaryna «Shyǵys bazary» kórmesi, túrli shoý-defıle jáne Abaı Qunanbaıuly men Jambyl Jabaevtyń týyndylaryn qamtyǵan «Taqyryptyq kitap» kórmesi, «Tarıhı dáýirlerdiń jandanǵan keıipkerleri» sııaqty sharalar usynyldy. Sonymen qatar atalǵan mýzeıdiń ekspozısııalyq zalynda tarıhı «Altyn adam» men «Tomırıs» beınesi somdalyp, ult tarıhynan syr shertetin «Qazaq handyǵy» jáne «Aısha bıbi men Qarahan» teatrlandyrylǵan qoıylymy kórsetildi. Is-shara barysynda shaǵyn konserttik baǵdarlama men mýzeı týraly túsirilgen arnaıy beınesıýjet te qamtyldy. Budan keıin oblystyq mádenıet, arhıvter jáne qujattama basqarmasy basshysynyń orynbasary Sara Mádıeva, oblystyq tarıhı-ólketaný mýzeıiniń dırektory Seıitjan Ilııas birqatar mádenıet salasynyń qyzmetkerlerin Alǵys hatpen marapattady. Al shara sońynda «Qaraqat» mektep-stýdııasynyń jetigenshileri «Elik-aı» halyq ánin oryndady.
Jambyl oblysy
