Bul is-sharanyń mánisi mynada boldy: jergilikti iri dúkenniń birine ústi azyq-túlik túrlerine toly ústel qoıyldy. Onyń janyna «Muqtajsyń ba – al, myrzasyń ba – sal» dep jazylǵan habarlandyrý ilindi. Iаǵnı dúkenge kirgen kez kelgen turǵyn shyn muqtajdyq qyssa, osy jerden ózine kerektisin alyp kete aldy. Al jaǵdaıy barlar bolsa, azyq-túliktiń qandaı da bir túrin satyp alyp, álgi ústeldiń ústine qoıyp ketip otyrdy. Munysymen ol qaıyrymdy iske óziniń úlesin qosqan edi.
– Aksııa ıdeıasyn bizdiń qordyń qyzmetin burynnan qadaǵalap júrgen, kómek kórsetip kele jatqan tanys balalar oılap tapty. Olar bul iske uzaq ýaqyt daıyndaldy: qarajat jınady, azyq-túlik ónimderin satyp aldy. Bul aksııanyń nendeı maqsatty kózdegenin adamdar túsinýi úshin arnaıy jadynama da jasady, – deıdi «Otzyv» qoǵamdyq qorynyń jetekshisi Aleksandr Korogodov.
Jastardyń bul ıgi isi turǵyndar tarapynan úlken qoldaý tapqanyn aıta ketken lázim. Mysaly, aksııa týraly qulaǵdar bolǵan jas kásipkerler bul iske ózderiniń úlesterin qosa bastady. Atap aıtqanda, jemis-jıdek satýmen aınalysatyn jas bıznesmender arnaıy ústeldiń ústin alma, banan, kıvı sııaqty jemistermen toltyryp tastady.
«Otzyv» qoǵamdyq qorynyń jetekshisi Aleksandr Korogodov qaıyrymdylyqpen aınalysyp júrgen jastardy barynsha qoldady. Ol aksııaǵa qarjylaı demeýshilik jasap, sonymen birge is-sharany durys uıymdastyrý jaǵynan qol ushyn berip, óziniń mol tájirıbesimen bólisti.
– Ústeldiń janynan ótken qarapaıym adamdar mundaı qaıyrymdy iske sener-senbesin bilmeı tańǵalýmen boldy, – deıdi «Otzyv» qorynyń jetekshisi. – Basynda jurttyń kóbi jastar azyq-túlik satyp tur dep oılady. Kóptegen muqtaj jannyń ústelge jaqyndaýǵa uıalǵanyn da kórdik. Biz olardy ózimiz shaqyryp alyp, kerektisin sómkelerine salyp berdik.
Al ústeldiń ústinde jemis-jıdekten bólek, kúrish, qaraqumyq, makaron, qant, tuz, un, sý, qurma sııaqty asa qajet azyq-túlik ónimderi bolǵan edi.
Jalpy, osyndaı qaıyrymdy isterdiń bel ortasynda júretin «Otzyv» qoǵamdyq qory osymen segizinshi qaıyrymdylyq aksııasyn uıymdastyryp otyr. Sońǵy ret ótkizgen is-shara barysynda olar azyq-túlik ónimderin satyp alyp, áleýmettik osal topqa jatatyn 40 otbasyna tegin taratyp berdi.
Atalǵan qordyń jetekshisi qaıyrymdylyq aksııalarynyń aldaǵy ýaqytta da jalǵasyn taba beretinin aıtady. «Qaıyrymdylyq adamdardy meıirimdi etedi», deıdi «Otzyv» qoǵamdyq qorynyń jetekshisi Aleksandr Korogodov.
Qaraǵandy oblysy
