Týrdyń alǵashqy oıyny Túrkistanda jergilikti «Turan» men Oraldyń «Aqjaıyq» klýbtary arasynda ótti. El chempıonatyna bıyl tuńǵysh ret qatysyp jatqanyna qaramastan, sońǵy úsh oıynda «Ordabasy», «Shahter», «Qyzyljar» sekildi tájirıbeli klýbtardy jeńip, fýtbol mamandary men jankúıerler nazaryn ózderine aýdarǵan «Turan» fýtbolshylarynyń shamasy bul joly «Aqjaıyqqa» jetpedi. Túrkistan oblysynyń ujymy qatarynan úsh jeńistiń eıforııasynan shyǵa almady ma, áıteýir óz alańynda «Aqjaıyqtan» 2:1 esebimen jeńilip qaldy. О́tken týrda byltyrǵy el chempıony «Qaırattan» úsh upaı alǵan «Aqjaıyq» jeńister serııasyn tórt oıynǵa jetkizip, týrnır kestesindegi 3-ornyn saqtap qaldy.
Al Oraldan abyroısyz oralyp, jankúıerlerdiń synyna ushyraǵan «Qaırat» osy týrda «Aqtóbeni» qabyldady. Synnan oń qorytyndy shyǵaryp, osy maýsymda alǵash ret jankúıerleriniń qoldaýymen oıyn ótkizgen Alekseı Shpılevskııdiń shákirtteri 4:2 esebimen jeńiske jetti. Chempıonattyń alǵashqy bes týryn sátti bastaǵan «Aqtóbe» osymen besinshi oıynda qarsylastarynan jeńildi.
Ár týr saıyn chempıondyqqa qaraı jaqyndap kele jatqan elordanyń «Astana» klýby bul joly qarsylasynan basym túsip, týrnır kestesinde ózinen keıingi oryndarda turǵan klýbtardan uzap bara jatyr. Syrt alańda Qyzylordanyń «Qaısarymen» kezdesken elordalyq ujym 5:2 esebimen jeńiske jetti. 12-týrdan beri birde-bir oıynda jeńilmegen «Astana» kelesi týrda óz alańynda «Qaıratty» qabyldaıdy. Eger elordalyqtar bul matchta da qajetti úsh upaıyna qol jetkizetin bolsa, onda qalǵan komandalarǵa «Astanany» tusap ustaý qıyn bolatyn sııaqty.
8-týrǵa deıin «Astananyń» sońyna erip, týrnır kestesinde ekinshi orynǵa deıin kóterilgen «Taraz» qatarynan tórtinshi oıynda upaı joǵaltty. О́tken týrlarda «Astana», «Tobyl» sekildi úzdik klýbtarǵa jol bergen jambyldyqtar bul týrda kósh sońynda kele jatqan «Jetisý» klýbyn jeńe almady. Tarazdaǵy Ortalyq stadıonda ótken oıyn 3:2 esebimen qonaqtardyń paıdasyna aıaqtaldy. 9 týrdan beri jeńiske jetip kórmegen Rınat Alıýetov shákirtteri osylaısha maýsymdaǵy ekinshi jeńisin toılady.
О́tken týrda «Qyzyljardan» jeńilgen «Kaspıı» bul joly «Shahterden» upaı aldy. «Jas Qanat» stadıonynda ótken matchta alań ıeleri bar máseleni alǵashqy taımda sheship tastady. Matchtyń 2-mınýtynda «Kaspıı» shabýylshysy Davıd Karaev esepti ashsa, 9-mınýtta Ýadjdı Salı tablodaǵy kórsetkishti eseledi. Al 30-mınýtta Karaev dýbldiń avtory atandy. Aıyp dobynan keremet gol soqqan ol osylaısha matchtyń núktesin qoıdy. Senimdi túrde jeńiske jetken alań ıeleri 16 upaımen 8-orynǵa kóterildi. Qaraǵandylyq ujym 8 upaımen 12-orynǵa taban tiredi.
Sońǵy tórt oıynnyń ekeýinde jeńilip, eki matchta teń túsken «Ordabasy» klýby bul týrda da upaı bólisýge májbúr boldy. Atyraýǵa qonaqqa barǵan shymkenttik ujym «Munaıshy» stadıonynda ótken oıynda «Atyraý» klýbymen 0:0 esebimen teń oınady. Kezdesýdiń 61-mınýtynda «Ordabasy» klýbynyń qorǵaýshysy Aleksandr Sımchevıch óz aıyp alańynan tártip buzǵandyqtan, tóreshi penaltı belgiledi. 11 metrlik aıyp dobyn oryndaǵan «Atyraý» klýbynyń jartylaı qorǵaýshysy Donet Shkodra bul múmkindikti golǵa aınaldyra almady. Bir upaıdy qanaǵat etken eki komanda da týrnır kestesindegi óz oryndaryn saqtap qaldy.
12-týrǵa josparlanǵan sońǵy matchta «Tobyl» óz alańynda Petropavldyń «Qyzyljar» klýbyn 2:0 esebimen aıqyn basymdyqpen jeńip, týrnır kestesindegi ekinshi ornyn saqtap qaldy. Qostanaılyq klýb sapynan 64-mınýtta Nemanıa Nıkolıch pen 77-mınýtta Serikjan Mujyqov mergendigimen kózge tústi.
Sóz basynda aıtqandaı, ózge týrlarmen salystyrǵanda bul týrdyń oıyndary golǵa baı boldy. Jeti matchtyń tek bir kezdesýinde ǵana esep ashylmady. Qalǵan alty oıynda jalpy – 25 gol soǵyldy. Bıylǵy maýsymdaǵy gol soǵý boıynsha rekord ázirshe 4-týrǵa tıesili – 32 gol.
23-24 mamyrda ótetin 13-týrda «Aqtóbe» – «Turan», «Astana» – «Qaırat», «Jetisý» – «Qaısar» (oıyndar jeksenbi kúni ótedi), «Ordabasy» – «Taraz», «Qyzyljar» – «Atyraý», «Shahter» – «Tobyl» jáne «Aqjaıyq» – «Kaspıı» (oıyndar dúısenbi kúni ótedi) klýbtary kezdesedi.
