Fýtbol • 25 Mamyr, 2021

«Astana» men «Qaırat» teń tarqasty

160 ret

kórsetildi

3 mın

oqý úshin

Fýtboldan Qazaqstan chempıonatynyń 13-týry aıasynda elordanyń «Astanasy» óz alańynda Almatynyń «Qaıratyn» qabyldady. Biraz jyldan beri eki komanda arasyndaǵy kezdesý – elimizdegi eń tartysty match sanalady. Tipti jankúıerler bul teketireske «El klassıkosy» dep te aıdar taqqan.

Álı BITО́RE

Match jankúıerler kútkendeı asa tartysty bastalǵan joq. Kezdesýdiń 30-mınýtyna deıin eki komanda biraz ańdysyp baqqanymen, eki klýb fýtbolshylary da qaqpaǵa dál soqqy jasaı almady. Tek birinshi taım sońyna qaraı azdaǵan belsendilik baıqaldy. Sondaı sátterdiń birinde «Qaırattyń» brazılııalyq shabýylshysy Vagner Lav komandalasy Hose Kanteni «Astana» qaqpashysymen betpe-bet shyǵarǵan. Alaıda Kante soqqysyn Nepogodov ońaı qaıtardy. Izinshe Neboısha Kosovıch dopqa birinshi jetip, soqqy baǵyttap úlgergen, alaıda ol baǵanadan keri serpildi. Budan keıin dop osy shabýyldy uıymdastyrǵan Vagner Lavqa jetkenimen, ol da qaqpany dál kózdeı alǵan joq. «Astana» aıyp alańynda erkin kósilgen almatylyqtardyń shabýylyn Kamo Oganesıan baspen túıindeýge talpynǵan. Biraq álsiz soqqyny qaqpashy tosyp aldy.

Birinshi taımda kórermender gol kóre alǵan joq. Ekinshi taım da sylbyr bastaldy. Degenmen, kezdesýdiń alǵashqy golyn 87-mınýtta «Astana» fýtbolshysy Tıgran Barsegıan soqty. Maks Ebongtan pas alǵan Barsegıan úsh birdeı qorǵaýshynyń arasynan sytylyp shyǵyp, qaqpashy Pokatılovty da aınalyp ótip, bos qalǵan qaqpany dál kózdedi.

Bul golǵa «Qaırat» oıynshylary jyldam jaýap berdi. Aıbol Ábikenniń alystan baǵyttaǵan joıqyn soqqysyn Nepogodov áreń qaıtaryp, aýtqa jibergen. 91-mınýtta aýttan áýeleı kelgen pasqa birinshi jetken kapıtan Súıimbaev dopty jerge túsirmegen kúıi teýip, «Astana» qorǵaýshylary men qaqpashysyn sharasyz qaldyrdy. Qorytyndy esep – 1:1.

13-týrdan keıin eki komanda arasyndaǵy aıyrmashylyq ózgerissiz qaldy – 12 upaı. «Astana» 33 upaımen kósh bastasa, «Qaırat» 21 upaımen tórtinshi satyǵa turaqtady. 14-týrda «Qaırat» óz alańynda «Qaısardy» qabyldasa, «Astana» syrt alańda «Kaspıımen» oınaıdy.

Sonymen qatar jeksenbiniń keshinde 13-týrdyń taǵy eki oıyny ótti. Qyzylordaǵa sapar shekken Taldyqorǵannyń «Jetisýy» syrt alańda «Qaısar» qaqpasyna jaýapsyz eki gol soǵyp, qatarynan ekinshi oıynda jeńiske jetti. Ekinshi oıynda «Aqtóbe» óz alańynda Túrkistan oblysynyń «Turan» klýbyn qabyldady. Qobylandy batyr stadıonynda ótken match 2:0 esebimen «Turannyń» paıdasyna aıaqtaldy. Túrkistandyq klýb bul oıynnan keıin 15 upaımen týrnır kestesinde «Aqtóbeni» artqa tastap, 10-orynǵa kóterildi.