Eńbek jáne halyqty áleýmettik qorǵaý mınıstri óz sózinde ótken jyldan bastap Qazaqstanda daǵdarysqa qarsy is-sharalar paketi sheńberinde Jumyspen qamtýdyń jol kartasy iske asyrylyp jatqanyn eske saldy.
2020 jyly JQJK aıasynda qurylys, rekonstrýksııalaý, kúrdeli jáne aǵymdaǵy jóndeý jumystary boıynsha 6,6 myń ınfraqurylymdyq joba iske asyryldy. 239 myń adam jumyspen qamtyldy, onyń 120 myńy jumyspen qamtý ortalyqtarynyń joldamalary boıynsha jumysqa ornalastyryldy.
«Jumyspen qamtýdyń jol kartasy 3 aýysymdy jáne apatty mektepterdiń problemalaryn ishinara sheshýge, aýyl turǵyndarynyń bilim alýǵa, densaýlyq saqtaýǵa jáne taza aýyz sýǵa qol jetkizýine, sýarmaly jáne jaıylymdyq jerler kólemin ulǵaıtýǵa, aýyldyq eldi mekenderdi gazdandyrýǵa múmkindik berdi. Sondaı-aq JQJK jumyssyzdyqtyń 4,9% deńgeıinde saqtalýyna yqpal etti», dep habarlady Serik Shápkenov.
Aǵymdaǵy jyly Jumyspen qamtýdyń jol kartasyn iske asyrýǵa 300 mlrd teńge kózdelgen. Onyń ishinde Ulttyq Banktiń oblıgasııalyq qaryzy esebinen 200 mlrd teńge qarastyrylǵan.
JQJK halyqtyń ómir súrý sapasyn arttyrý; ShOB úshin qarjylandyrýdyń qoljetimdiligin arttyrý; agroónerkásiptik keshendi damytý; óńirlerde bıznesti damytý sııaqty tórt baǵyt boıynsha iske asyrylady.
«Qarjylandyrý lımıtteri jumys kúshiniń úlesine sáıkes aıqyndalyp, óńirler boıynsha bólindi. Qarajattyń negizgi bóligi 42,5% (127,5 mlrd teńge) halyqtyń ómir súrý sapasyn arttyrýǵa, 33,3% (100 mlrd teńge) agroónerkásiptik keshendi damytýǵa, 24,2% (72,5 mlrd teńge) óńirlerde bıznesti damytýǵa jáne «Atameken» UKP men jergilikti atqarýshy organdardyń qatysýymen mıkroqarjy uıymdary arqyly mıkrokredıt berýge baǵyttalǵan», dep túsindirip ótti mınıstr.
Sondaı-aq Serik Shápkenov birinshi baǵyt boıynsha 136 joba iske asyrylatynyn, olarda barlyǵy 19 myń jumys orny qurylatynyn, onyń 7,5 myńy turaqty bolatynyn habarlady.
«64 jańa mekteptiń, 13 densaýlyq saqtaý nysanynyń qurylysy, sýarý keshenin jańartý jáne TÚKSh júıesin jańǵyrtý boıynsha jumystar júrgiziletin bolady. Jobalardy irikteý kezinde turaqty jumys oryndaryn qurýǵa jáne 3 aýysymdy jáne apatty mektepterdiń keıbir máselelerin sheshýge, aýyl turǵyndarynyń densaýlyq saqtaý men taza aýyz sýǵa qol jetkizýin qamtamasyz etýge, sýarmaly jáne jaıylymdyq jerlerdiń aýdanyn ulǵaıtýǵa basa nazar aýdaryldy», dep tolyqtyrdy Eńbekmıniniń basshysy.
Memleket basshysynyń tapsyrmasy boıynsha «ShOB úshin qarjylandyrýdyń qoljetimdiligin arttyrý» ekinshi baǵyty sheńberinde 6%-ǵa deıingi mólsherlememen jeńildetilgen mıkrokredıtter berý kózdelgen. О́ńirlerde mıkrokredıt berý quralyn iske asyrýdyń tıimdiligin qamtamasyz etý úshin «Atameken» UKP jáne jergilikti atqarýshy organdardyń qatysýymen 15 mıkroqarjy uıymy quryldy.
«22,5 mlrd teńge somasyna 5,4 myń jobadan turatyn tizim jasaldy, ol et ónimderin óndirý jáne qaıta óńdeý, sút, tamaq ónerkásibi, qyzmet kórsetý jáne basqa da salalardaǵy jobalardy qamtıdy. Mıkrokredıt alýshylar 10,6 myń qosymsha jumys ornyn ashady», dedi Serik Shápkenov.
Agroónerkásip keshenin damytý baǵyty boıynsha Aýyl sharýashylyǵy mınıstrligi jáne «Báıterek» Holdıngi birlesip, sońǵy qaryz alýshy úshin 6% - ǵa deıingi mólsherlememen 100 mlrd teńge somasyna 42 ınvestısııalyq jobany iske asyratyn bolady (mólsherlemeni sýbsıdııalaýdy eskere otyryp).
Jobalar mynadaı sharttar boıynsha irikteldi: jumyspen qamtýdy qoldaý jáne jumys oryndaryn qurý; pysyqtalýdyń joǵary deńgeıi; azyq-túlik taýarlarynyń ımportyn qysqartý.
2,2 myń ýaqytsha jáne 3,8 turaqty jumys orny qurylady.
Bıznesti damytý sheńberinde óńirlerde jeńildikpen kredıt berý jáne bıznes sýbektilerine qaryz berý, sondaı-aq jarǵylyq kapıtalǵa ınvestısııalaý, qarjylyq emes qoldaý kórsetý esebinen 6 myńǵa jýyq jumys orny qurylatyn bolady.
«Aǵymdaǵy jyly Jumyspen qamtýdyń jol kartasyn iske asyrý 35,6 myń jumys ornyn qurýǵa múmkindik beredi, onyń 55%-dan astamy turaqty bolady (20,3 myń). Otbasy múshelerin eskere otyryp, shamamen 80 myń adam turaqty tabyspen qamtamasyz etiledi. Sondaı-aq JQJK áleýmettik aktıvterdi qurý arqyly áleýmettik ınfraqurylymdy jaqsartýǵa; jańa óndiristerdi qurý esebinen naryqty otandyq óndiris ónimderimen tolyqtyrýǵa; eldiń JIО́ qurylymynda shaǵyn jáne orta bıznestiń úlesin arttyrýǵa yqpal etetin bolady», dep túıindedi Serik Shápkenov.
