Kanadanyń joly bolar emes

Álem birinshiliginiń tórtinshi kúninde A tobynyń eki oıyny, V tobynyń eki kezdesýi ótti. A tobynda Slovakııa jáne Shveısarııa quramasymen birge kósh bas­tap turǵan Reseı hokkeıshileri jeńisti jolyn jalǵastyra almady. Slovakııamen muzaıdynda jolyqqan soltústiktegi kór­shilerimiz 1:3 esebimen jeńilip qaldy. Eki qurama arasyndaǵy matchtyń alǵashqy kezeńinde esep ashylmady. Ekinshi kezeńde esepti birinshi bolyp Slovakııa ashty. 30-mınýtta shabýylshy Mılosh Kelemen mergendigimen kózge túsip, quramasyn alǵa shyǵarsa, Reseı hokkeıshileri bul golǵa jyldam jaýap berdi. 31-mınýtta Aleksandr Barabanov tarazy basyn teńestirip ketti. Úshinshi kezeńde Slovakııa quramasy bes mınýttyń ishinde eki shaıba soǵyp, jeńisti qarsylastarynan julyp aldy. 53-mınýtta Martın Gernat san basymdyǵyn tıimdi paıdalansa, 58-mınýtta Marek Dıaloga bos qaqpany dál kózdedi.

Osylaısha, mańyzdy úsh upaıy­nan aıyrylǵan Reseı qu­ramasy úshinshi týrdan keıin týrnır kestesinde ekinshi orynǵa syrǵydy. Al qatarynan úsh match­ta jeńiske jetken Slovakııa 9 upaımen jeke-dara kósh bastady.

Sonymen qatar ótken týrda Shvesııa quramasynan basym túsken Belarýs hokkeıshileri bul joly Chehııadan overtaımda utyldy. Kezdesýdiń alǵashqy kezeńinde teń oınaǵan quramalar ekinshi kezeńde úsh shaıba soqty. 25-mınýtta Belarýs oıynshysy Egor Sharangovıch esep ashsa, kezeń sońyna deıin Chehııa quramasy eki gol soǵyp, esepte alǵa shyqty. Gol avtorlary – Iаn Kovarj pen Fılıp Zadına. Úshinshi kezeńde Vladıslav Eremenko tarazy basyn teńestirip, oıyn overtaımǵa ulasty. Qosymsha ýaqytta Alek­sandr Alekseev mergendik tanytyp, Chehııa quramasyna álem chempıonatyndaǵy alǵashqy je­ńisti syılady. Esep – 3:2.

V tobyndaǵy oıyndarǵa toq­talar bolsaq, Italııa qura­ma­syn qabyldaǵan Latvııa qarsy­las­tarynyń qaqpasyna jaýapsyz úsh shaıba soǵyp, kezekti jeńisine qol jetkizdi. Bul oıynda Latvııa quramasy sapynan Martınsh Karsýms eki márte mergendigimen kózge tússe, Laýrıs Darzınsh úshinshi goldyń avtory atandy.

Chempıonatty óte sátsiz bas­taǵan Úıeńki japyraqtar eliniń hokkeıshileri úshinshi týrda da jeńilistiń kermek dámin tatýǵa májbúr boldy. Eki týrdan beri qarsylastaryn qoǵadaı japy­ryp kele jatqan Germanııa úshinshi týrda Kanadadan aılasyn asyryp ketti. Esep – 3:1. Germanııa bul jeńisinen keıin V tobynyń týrnır kestesinde 9 upaımen kósh bastady.