Aıta keterligi, munda jylyna 30 MVt elektr energııasyn óndiretin kún stansasy jumys istep tur. Endi energııa jeldiń kúshimen de óndirilmek. Mundaı qurylǵylardyń tabıǵatqa, qorshaǵan ortaǵa tıgizer zııany joq. Kerisinshe, jaıylymdaǵy qoıdyń ózi alyp qapalaqtardyń túbine kelip jýsaıtyn kórinedi. Jel men kún stansalarynyń eń basty artyqshylyǵy – qýat kózi sarqylmaıdy. Shyǵystaǵy sý elektr stansasyna túsip turǵan salmaqty azaıtý maqsatynda 2017 jyly bul joba usynylyp, «Charsk Veter» JShS jumysty qolǵa alǵan-tuǵyn. Aýdan ákimdigi qapalaqty 17 qurylǵy men stansasyna jer bóldi. Qazirgi ýaqytta qurylys qarqyndy júrip jatyr.
– Bul salada bizdiń tájirıbemiz bar. Biletin shyǵarsyzdar, Almaty oblysyna qarasty Qapshaǵaı, Sarybulaq, Shilikte jel elektr stansalaryn ornattyq. Sondaı-aq Aqmolanyń Ereımentaýynda jumys istep, ekologııalyq taza jolmen elektr energııasyn óndirip tur. Jańǵyztóbeniń tóńiregi de zertteldi. Jeldiń kúshi bar. Josparǵa saı, jyl sońynda 17 qurylǵyny iske qosamyz, – deıdi montajdaýshy Jeńis Altaev.
Jasyl energııa óndirý jobasynyń quny – 7 mlrd 400 mln teńge. Kólemdi ári salmaqty qurylǵylaryn satyp alý óz aldyna, jetkizý de ońaı emesteı kórindi. О́ıtkeni sonaý Gollandııadan ákelgen eken. Endigi jumys, birneshe tonna tartatyn generatordy 60 metr bıiktikke kranmen kóterip ornatý qajet. Onyń bári aıtýǵa ońaı bolǵanymen, is júzinde qajyr-qaıratty qajet etetin jumys. Montajdaýshy Jeńis Altaevtyń aıtýynsha, generatorlardy bıikke kóterý úshin arnaıy krannyń kómegi kerek. Alaıda eńbek aqtalady. Elge tıgizer paıdasy da zor. Elektr energııasymen qamtýdan bólek, stansa iske qosylǵan soń 12 adam turaqty jumyspen qamtylady. Qazirgi ýaqytta qurylysymen 40-50 azamat aınalysyp júr. Onyń ishinde aýyldyqtar da bar.
– Balamaly elektr energııasy boıynsha 2017 jyldan beri jumystar júrip jatyr. Jyldyq qýaty 30 MVt kún elektr stansasy iske qosylǵan. Endi «Charsk Veter» mekemesi jumys júrgizýde. Kún men jel elektr stansalary bir jerden energııa berýi elimizdiń basqa óńirlerinde joq, – deıdi Jarma aýdandyq kásipkerlik bóliminiń basshysy Maqsat Qasymov.
Jel elektr stansasynyń jumysyn qarapaıym tilmen túsindirer bolsaq, soqqan jelden tonna tartatyn qapalaqtar arqyly qýat óndirip, bir akkýmýlıatorǵa quıady. Sol jerden ári qaraı taraıdy. Ol úshin «KEGOC» AQ basshylyǵymen kelisimshart jasaldy.
Shyǵys Qazaqstan oblysy,
Jarma aýdany
