Jer-jahandaǵy qalyptasqan ahýalǵa baılanysty dástúrli festıval ádettegi qalpyn ózgertip, onlaın formatta uıymdastyryldy. Aýqymdy shara ártúrli sanat boıynsha jyl saıyn ótkiziledi. Temirlan men Ernat 68 memlekettiń ókilimen dodaǵa qatar túsip, 1-shi oryndy ıelendi.
«Festıvaldiń alǵashqy kezeńinde Qurmanǵazy men Nurǵısa Tilendıevtiń kúılerinen kúı-shashý oryndadyq. Al grand-fınalda Vıvaldıdiń «Jyl mezgilderi» sıklindegi «Jaz» týyndysyn usyndyq. Dálirek aıtsaq, onyń ózimiz óńdegen nusqasyn tartý ettik. Aqtyq synǵa arnalǵan tamasha beıne baıandy Ulybrıtanııadan kelgen mamandar túsirdi», deıdi Temirlan Oljabaı.
Golden Time Talent uıymdastyrýshylary qazaqstandyq talanttardy 2018 jyly Gollıvýdta ótken halyqaralyq World Championships konkýrsynda baıqaǵan eken. Dál osy dodada Temirlan men Ernat top jarǵan bolatyn. Sol kezde-aq olarǵa festıvalge qatysý týraly usynys túsken.
«Jeńiske jetkenimizge qýanyshtymyz. Uıymdastyrýshylar bizge kelisimshart usynyp otyr. Buıyrtsa, álemdegi epıdemııalyq jaǵdaı turaqtalyp, ushaqpen qatynaý qalypqa túsken soń, Ulybrıtanııaǵa baryp konsert bermekpiz», deıdi Ernat Naýryz.
Temirlan men Ernat – elordadaǵy Qazaq ulttyq óner ýnıversıtetiniń túlekteri. 2017 jyldan beri jup qurap, jurtshylyqty tánti etip keledi. Búginge deıin dombyrashy jigitter Dımash Qudaıbergenmen birge Qytaıda ótken I'm a Singer konkýrsynda óner kórsetti. Sondaı-aq joǵaryda atap ótkenimizdeı, World Championships dodasynda top jardy. Budan bólek, Túrkııa men Izraılde jáne Eýropanyń birqatar qalalarynda ónerin pash etken.
Qos talant endi osy jyly Túrkııa men Dýbaıda jeke konsert bermek. Qazir jaýapty sharaǵa qyzý daıyndyq júrip jatyr.
