Jerlesterimiz úshinshi týrda azýly AQSh quramasymen sheberlik baıqasty. Álemdik reıtıngte altynshy orynda turǵan Amerıka hokkeıshileri alǵashqy týrda Fınlıandııaǵa 1:2 esebimen ese jibergennen keıin, ekinshi týrda Kanada quramasyn iri eseppen jeńdi – 5:1. Ár týr saıyn oıyndary qarqyn alyp kele jatqan Soltústik Amerıka ókilderi úshinshi týrda Qazaqstan quramasynyń qaqpasyna jaýapsyz úsh shaıba soqty.
Qazaqstan quramasynyń álem birinshiligindegi ótken eki oıynymen salystyrǵanda, Iýrıı Mıhaılıs AQSh-qa qarsy ótken matchta quramǵa azdaǵan ózgeris engizgenin baıqadyq. Máselen, buǵan deıingi kezdesýlerde alǵashqy bestikte oınaǵan shabýylshylar Aleksandr Shın men Evgenıı Rymarevtiń ornyna Roman Starchenkomen birge Kırıll Panıýkov jáne Dmıtrıı Shevchenko shyqty. Sonymen qatar bir oıynǵa aıyptalǵan qorǵaýshy Vıktor Svedbergti Valerıı Orehov almastyrdy. Bul V.Orehovtyń álem birinshiligindegi alǵashqy matchy boldy.
AQSh hokkeıshileri oıyn bastalǵan sátten bastap tizgindi óz qoldaryna alyp, kezdesýdiń 7-mınýtynda esepti ashty. Goldyń avtory – Adam Klendenıng. Goldan keıin de amerıkalyqtar Boıarkın qorǵaǵan qaqpanyń mańaıyn biraz torýyldaǵanymen, qazaqstandyq qaqpashy shaıba soǵýǵa múmkindik bergen joq. Birinshi kezeńde amerıkalyqtar bizdiń qaqpaǵa 25 (!) soqqy jasady. Onyń tek bireýi ǵana golǵa aınaldy. Al Qazaqstan hokkeıshileri birinshi kezeńde 8 márte soqqy jasady.
Ekinshi kezeńde de belsendi bolǵan qarsylastar 22-mınýtta esepti 2:0-ge jetkizdi. Bul joly 26 jastaǵy «Los-Andjeles» klýbynyń shabýylshysy Trevor Mýr kózge tústi. Buǵan deıingi oıyndarda kóbine san basymdyǵyna ıe bolǵan sátterde de gol soǵatyn Qazaqstan quramasy AQSh-pen ótken oıynda mundaı múmkindikterin paıdalana almady.
Úshinshi kezeńde de amerıkalyqtar oıyn bastalǵan sátte gol soǵyp ketti. 42-mınýtta Raıan Donato men Mett Tennısonnan pas alǵan Djek Drýrı muzaıdynnyń orta tusynda ornalasqan kók syzyqtan bizdiń qaqpaǵa gol soǵyp ketti. Qazaqstandyq hokkeıshiler match sońyna deıin esep aıyrmasyn qysqartýǵa tyrysqanymen, bul oıynda otandastarymyzǵa gol soǵý baqyty buıyrmady. Qorytyndy esep 3:0 AQSh-tyń paıdasyna.
Osylaısha, Qazaqstan quramasy álem chempıonatyndaǵy alǵashqy jeńilisine ushyrady. Matchtan soń Qazaqstan ulttyq quramasynyń bas bapkeri Iýrıı Mıhaılıs oıynǵa qatysty óz pikirin bildirdi. «AQSh sekildi azýly komandaǵa qarsy oınaý biz úshin úlken tájirıbe boldy. Keıbir sátterde biz shabýyldan qorǵanysqa, qorǵanystan shabýylǵa shyǵýǵa úlgermeı jattyq. Qarsylastarymyzǵa kezdesýdiń basym bóligin óz aımaǵymyzda ótkizýge múmkindik berip qoıdyq. Bizdiń komandada da gol soǵatyn birneshe múmkindik bolǵanymen, ony júzege asyra almadyq. Qarsylas komandanyń oıyny bizge sabaq boldy. Kelesi kezdesýlerde qatelikterimizdi túzeýge tyrysamyz», dedi Iýrıı Mıhaılıs.
Bas bapker sózinde turdy. Germanııamen bolǵan tórtinshi týr oıynynda Qazaqstan quramasy tabandylyq tanytyp, kezdesý sońyna qaraı jeńisti qarsylastarynan julyp áketti. Goldardyń avtorlary – Aleksandr Shın, Roman Starchenko jáne Pavel Akolzın.
Nemister oıyn esebin ózgertýge qansha kúsh salǵandarymen, olarynan nátıje shyqpady.
