Dúnıejúzilik densaýlyq saqtaý uıymynyń bas dırektory doktor Tedros Gebreıesýs 2021 jylǵy bes aıda koronavırýs juqtyrý jáne ólim jaǵdaılary 2020 jylǵa qaraǵanda kóbirek tirkelgenin málimdedi. .
Onyń sózine sensek, vırýstyń taralýyn ár el baqylaýǵa almaıynsha, pandemııa aıaqtalmaıdy. Al qazir kez kelgen memleket halqyn ekpemen jappaı qamtamasyz etse de, koronavırýsty jeńdik dep aıtýyna áli erte.
«Qazirgi vaksınalaý salasyndaǵy daǵdarys pandemııany uzartyp, teńsizdikti aıqyn kórsetedi. Mysaly, salynǵan búkil ekpeniń 75 paıyzy – 10 elge tıesili.
Bul ıdeıany eshqandaı dıplomatııalyq formada ustaý múmkin emes. Vaksınalardyń kóp bóligin óndiretin jáne satyp alatyn elderdiń shaǵyn toby álemniń qalǵan bóligindegi jaǵdaıdy baqylaıdy», dedi DDU basshysy.
Tedros Gebreıesýstyń keltirgen málimetine saı, osy kúnge deıin jasalǵan ekpelerdiń dozalary neǵurlym ádil bólingen jaǵdaıda álemdegi barlyq medısına qyzmetkeri men egde jastaǵy adamdarǵa jetetin edi. Sondaı-aq ol búgingi tańda COVAX bastamasy aıasynda 125 elge 72 mıllıon vaksına dozasyn jetkizýge bolatynyn eske saldy. DDU basshysy damyǵan elderdi preparattardy kedeı memlekettermen, sonyń ishinde COVAX arqyly bólisýge shaqyrdy. Buǵan qosa, Dúnıejúzilik densaýlyq saqtaý uıymynyń halyqaralyq qoǵamdastyqtyń aldyna qoıǵan maqsattary týraly aıtty. Bıylǵy qyrkúıekke deıin ár el halqynyń keminde 10 paıyzyn jáne jyldyń sońyna qaraı 30 paıyzyn vaksınalaýy tıis.
«Bul ólim jaǵdaılary men aýrýdyń aýyr túriniń aldyn alady, medısına qyzmetkerlerin qorǵaıdy jáne ekonomıka men qoǵamdyq ómirdi qaıta qalpyna keltiredi», dedi Tedros Gebreıesýs.
