Qazaqstanmen kórshiles Reseı arasyndaǵy strategııalyq áriptestik pen yntymaqtastyqtyń nátıjesinde «Baıqońyr» ǵarysh aılaǵyn saqtap, jarty ǵasyrdan asa ýaqyt onyń ınfraqurylymyn tıimdi paıdalanyp kelemiz. Sondaı-aq búginde «Baıqońyrdy» ǵarysh salasynyń ǵana emes, týrızm ındýstrııasynyń álemdik brendine aınaldyrýǵa tolyq múmkindik bar.
Álemdik tájirıbe ǵarysh týrızmin damytýdyń tartymdylyǵy men ekonomıka jaǵynan tıimdiligin kórsetedi. Qazirdiń ózinde ınfraqurylymy damyǵan, qoljetimdi baǵa usynatyn osyndaı ǵarysh ortalyqtary jylyna 1,5 mıllıon týrısti qabyldap, 270 mln AQSh dollaryna deıin tabys tabady. Atalǵan keshendegi ınfraqurylymy damyǵan oıyn-saýyq ortalyqtary, túrli shoý-baǵdarlama, ekskýrsııalar osyndaı nátıjege qol jetkizýge múmkindik berdi.
Kazakh Tourism ulttyq kompanııasynyń Basqarma tóraǵasy Erjan Erkinbaevtyń aıtýynsha, álemde ǵarysh týrızmine suranys jyl saıyn kem degende 9%-ǵa ósip kele jatyr.
– «Baıqońyr» ǵarysh aılaǵynda týrızmdi damytýdy biz suranysqa ıe salalyq baǵyttardyń biri retinde qarastyramyz. Zertteýlerge súıensek, búkil álem boıynsha 280 mıllıonǵa jýyq týrıst salalyq týrızmniń túrli baǵytyn tańdaıdy. Onyń ishinde álem halqynyń 9 paıyzy jyl saıyn ǵaryshtyq týrızmdi tańdaıdy. «Baıqońyrdyń» adam erki men aqyl-oıynyń dárejesin kórsetetin deńgeıin áli keń kólemde kórsete almaı kelemiz. Osy olqylyqtyń ornyn toltyrý maqsatynda Mádenıet jáne sport mınıstrligi men Kazakh Tourism birlesip marketıng, beınekontentti ilgeriletý jáne odan ári damý máselelerin pysyqtaý boıynsha belsendi jumys istep jatyr.
Osy rette «Baıqońyrdy» qoljetimdi saıahat ornyna aınaldyrý úshin birinshi kezekte ǵarysh aılaǵyna kirý máselesin sheshý qajet.
Jaqynda Premer-Mınıstr Asqar Mamın bastaǵan qazaqstandyq tarap reseılik áriptesterimen kezdesý barysynda qala men ǵarysh aılaǵynyń aýmaǵyna baqylaý-ótkizý rejimin jeńildetýdi usyndy. Sonymen qatar eń zamanaýı standarttarǵa saı jabdyqtalǵan jáne turaqty reısterdi qabyldaýǵa daıyn «Kraınıı» áýejaıyn paıdalaný jaıyn usyndy. Al uzaqmerzimdi perspektıvada «Baıqońyr» aýmaǵyna vızasyz rejim engizý sheteldik týrısterdi tartýdyń tıimdi sharasy bolýy múmkin.
Kezdesý aıasynda iske asyrýǵa daıyn jobalardyń ıdeıalary aıtyldy. «Ǵarysh aılaǵynda temir jol jelisi damyǵan keshen aýmaǵynda týrıstik poıyzdy iske qosý arqyly balalar men jasóspirimder týrızmin damytýǵa alǵyshart jasaýǵa bolady. Budan bólek qazirdiń ózinde birqatar qyzyq jobany iske qosýǵa múmkindik bar», dedi Erjan Erkinbaev.
Jýyrda ǵarysh aılaǵynyń aýmaǵyna kelgen týrıster úsh kún nemese odan da uzaq merzimge turaqtaı alýy úshin taqyryptyq saıabaq, ǵaryshtyq attraksıondar, qonaqúı keshenderi jáne demalys oryndary bar týrıstik aımaq paıda bolmaq.
«Baıqońyr» jaqyn arada álemdik ǵaryshtyq týrızmniń jańa núktesine aınalady degen úmit bar.
