Taraptar eki el arasyndaǵy yntymaqtastyqty, onyń ishinde parlamentaralyq baılanysty arttyrý jaıynda pikir alysty.
Nurlan Nyǵmatýlın Belgııa Qazaqstannyń Eýropadaǵy mańyzdy saıası jáne ekonomıkalyq áriptesi ekenine nazar aýdara otyryp, eki el arasyndaǵy strategııalyq seriktestik deńgeıine jetýdegi Tuńǵysh Prezıdent – Elbasy Nursultan Nazarbaevtyń rólin atap ótti.
Sonymen qatar kezdesýdegi negizgi taqyryptardyń biri – Memleket basshysy Qasym-Jomart Toqaev bastamashy bolǵan eldiń saıası júıesin jańǵyrtý máseleleri týraly boldy.
Otyrysta Nurlan Nyǵmatýlın memleket pen qoǵam arasyndaǵy dıalogty keńeıtý, sondaı-aq Prezıdenttiń saıası reformalaryndaǵy negizgi máseleler – mıtıng jáne saılaý týraly zańdar jaıynda aıtty.
Taraptar Qazaqstan-Belgııa qarym-qatynastarynyń mańyzdy quramdas bóligi retinde parlamentaralyq baılanysty jandandyrýdy qoldady.
О́z kezeginde Elıan Tılıo Qazaqstan – óziniń damý jolyn usynǵan memleket ekenin, búgingi tańda qarqyndy túrde damyp kele jatqanyn alǵa tartty. Sonymen qatar qos memleket arasyndaǵy dıplomatııalyq qatynastyń ornaǵanyna 30 jyl tolatynyn atap ótip, qalyptasqan saıası-ekonomıkalyq baılanysty odan ári nyǵaıtýǵa nıetti ekenin jetkizdi.
Kezdesý barysynda Nurlan Nyǵmatýlın men Elıan Tılıo zańnamalyq tájirıbe almasý, yntymaqtastyq jónindegi parlamenttik toptar men komıtetterdiń ózara is-qımyly eki eldiń jan-jaqty áriptestigin ilgeriletýge yqpal etetinine senim bildirdi.
