Qazir respýblıkaǵa belgili fototilshi Bolat Omarálıev kezinde fotoetıýdtermen áýestenip, kóp ýaqytyn soǵan jumsady. Jarty ǵasyrlyq shejiresi bar baıqaýlarda baıyrǵy fototilshiniń «aty talaı báıgeden kelgen». Búginde sol tamasha jumystardyń biriniń tarıhyn baıandaı ketýdiń reti kelip tur. Estelikti aqyn Asqar Kirebaev bólisti.
«Ol kezde aýdandyq gazette isteımiz. Bir kúni bizdiń úıden túski as iship otyrǵanda men Bolatqa: «Sen fotoetıýd túsirgish bolsań, saǵan bir-eki sıýjet beremin. Sony túsirip alsań, elden ozasyń», dedim ázildep.
Shaı iship bolǵan soń tórt jasar úlken ulym Shyńǵystyń qolyna dombyra ustatyp, dıvanǵa otyrǵyzdyq. Bolat fotoapparatyn daıyndap otyr. Ásheıinde dombyrany qolyna ustap otyra qalatyn balam bul joly Bolattan uıaldy ma, qyrsyqty da qaldy. «Shyńǵys, óleń aıt, mynany aıt, anany aıt», dep jalynyp jatyrmyn, bolmaıdy.
Daǵdarǵan kezimde munyń erkeligin ózine paıdalanaıyn dedim de, «Shyńǵys, Bolat ıt qoı», dep aıqaıla dedim. Qıqaıyp otyrǵan bala qulpyryp sala berdi. О́zi dıvanda, dombyra qolynda, kózi jumýly, álgi sózdi aıqaılap qoıa bersin. Men taǵy aıt dep kótermeleımin, erke balaǵa bir ermek tabyldy. Al mundaı sıýjetti izdese de taba almaıtyn Bolat bala ıt demek túgil, shoshqa dese de qaraıtyn emes, murny pysyldap, jan-jaǵynan sartyldatyp túsirip jatyr.
Obaly ne kerek, Bolattyń ózi de sýrettiń piri ǵoı, ádemi fotoetıýd tórt jasar bala án shyrqap otyrǵandaı shyqty. Keıin 1979 jyly «Sosalıstik Qazaqstan» gazeti «Bes jyldyq jáne biz» foto báıgesin jarııalady. Kún saıyn, jyl aıaǵyna deıin fotobáıgeniń sýretteri jarııalanyp turdy.
Baıqaýǵa myńdaǵan sýretpen júzdegen fototilshi qatysty. Bolat bas báıgeni «Án salaıyn áýeletip» degen osy sýretimen jeńip aldy.
«SQ» jigitteri biledi. Gazet shyǵyp ketkennen keıin onda jarııalanǵan sýretterdiń túpnusqasy kópke deıin saqtalady. Sodan «SQ» hatshylyǵyna jazýshy Asqar Súleımenov baryp qalmaı ma? Álgi sýret qyzyqty kompozısııasymen Asekeńniń kózine ottaı basylyp, qolyna alyp:
– Jigitter, myna sýret qaıdan? – dep suraıdy.
– Qyzylordadan. Bolat Omarálıev deıtin shtattan tys tilshimizdiń dúnıesi.
– Olaı bolsa, osy bala ne Iranbektiń, ne Asqardyń balasynyń sýreti. Tipti basqa áıelinen tapsa da, sol ekeýiniń balasy depti de, sýretti qaltasyna salyp alypty.
Bul sýret Asekeń akademııalyq teatrda ádebıet bóliminiń meńgerýshisi bolǵan kezinde, biraz jyl jaqtaýǵa salynyp, ilýli turdy», dep eske alady aqyn Asqar Kirebaev.
