Jýyrda ótken baspasóz konferensııasynda oblystyń bas memlekettik sanıtarlyq dárigeriniń jazǵy maýsymda demalys oryndarynyń jumys isteý tártibin bekitetin qaýlysynyń erejeleri túsindirildi. Týrızm jáne syrtqy baılanystar basqarmasynyń basshysy Marat Qabaqov jyl basynan beri jazǵy maýsymǵa daıyndyq aıasynda kásipkerlerden kelýshilerge PTR anyqtamasynsyz qyzmet kórsetý týraly kóptegen ótinish kelip túskenin aıtty.
Kásipkerlerdiń usynystary boıynsha jazǵy maýsymda týrısterdi ornalastyrý oryndary jańa formatta jumys isteıtin bolady. Ony kásipkerlerdiń ózderi usynǵan. Endi Úrjar, Katonqaraǵaı jáne Altaı aýdandarynyń barlyq demalys bazasynda Ashyq júıesi ornatylýy tıis. Júıe boıynsha «kók» jáne «jasyl» deńgeıdegi demalýshylar demalys bazasyna kire alady. Sonymen qatar demalys ortalyqtaryna koronavırýsqa qarsy vaksınalaý tólqujatyn kórsetken azamattar da jiberiledi.
– Týrıstik-rekreasııalyq aımaqtarda demalǵysy keletin adamdar teris nátıjesi bar PTR- testileý týraly nemese Covid-19 indetine qarsy vaksınalaýdyń tolyq kýrsyn alǵanyn rastaıtyn qujaty bolýy kerek. Demalys bazasynda ınternet istemeı, Ashyq qosymshasyn iske qosý múmkin bolmasa da, sapardan buryn úıden shyqpaı-aq ózińizdi tekserip, demalys ornyna jetken soń sol aqparatty usynýǵa bolady, – deıdi oblystyq sanıtarlyq-epıdemıologııalyq baqylaý departamenti basshysynyń orynbasary Ǵalymbek Alın.
Onyń aıtýynsha, «sary» jáne «qyzyl» mártebesi bar demalýshylarǵa týrıstik-rekreasııalyq aımaqtarǵa kirýge ruqsat joq. Bul koronavırýs taralýynyń aldyn alý úshin istelip jatqan shara ekeni túsinikti. Demalys oryndarynda áleýmettik ara qashyqtyqty saqtaý úshin belgiler de jasalady. Erejede kórsetilgendeı, jaǵajaıda demalýshylar 1,5 metr qashyqtyqty saqtaýlary kerek eken. Al kópshilik jınalatyn oryn ýaqytymen dezınfeksııalanady.
Oblystyq kásipkerler palatasynyń dırektory Qaırat Mamyrbaevtyń aıtýynsha, Alakóldiń jaǵalaýynda 188 demalys ornynyń 153-i aýmaqtyq sanıtarlyq-epıdemııalyq baqylaý basqarmasynyń qorytyndysyn aldy. 9 demalys bazasy Ashyq jobasyna qosyldy. Altaı aýdanynda 102 demalys ornynyń tek ekeýi ǵana Ashyq qosymshasy boıynsha QR-kod alýǵa ótinim berdi. Al Katonqaraǵaı aýdanynda 23 bazanyń bireýi ǵana QR-kod almaq.
Týrızm jáne syrtqy baılanystar basqarmasynyń basshysy Marat Qabaqovtyń aıtýynsha,
17-20 mamyr aralyǵynda Alakóldiń jaǵalaýynda keshendi jumys toby sanıtarlyq-epıdemııalyq, órt qaýipsizdigi, qoǵamdyq tártipti saqtaý, sýdaǵy qaýipsizdik boıynsha monıtorıng jasap, túsindirý jumystaryn júrgizdi. Shomylý maýsymynda alty adamnan turatyn qutqarýshylar jáne 2 avtokólik pen júzý quraldary jumyldyrylady.
– Jaǵalaý syzyǵynyń boıynda 4 baqylaý orny bar. Endi sý aıdyndaryndaǵy qaýipsizdik qaǵıdalarynyń talaptaryna sáıkes qajetti jabdyǵy bar qutqarý beketin ornatý josparda bar. Kıim aýystyrý úshin qosymsha 15 kabına ornatý, 100-ge jýyq qoqys konteınerlerin satyp alý oıda bar, – deıdi Marat Qabaqov.
Úrjar aýylyndaǵy áýejaıdyń ýaqytsha jabylýyna baılanysty Nur-Sultan, Almaty, О́skemen, Semeı qalalarynan Alakólge baǵyt alǵan poıyz vagondarynyń sany artty. Barlyǵy 3 330 oryndyq 69 vagon iske qosylyp, aptasyna 3 ret jóneltiletin bolady. Sonymen qatar avtobýstar sany eki ese artty. Jazǵy maýsymda kún saıyn 768 oryndyq 16 avtobýs iske qosylady. Qazirgi ýaqytta keshendi jumys toby Buqtyrma sý qoımasy men Sibe kólderiniń jaǵalaýlaryn tekserý ústinde.
Shyǵys Qazaqstan oblysy
