Áneýgúni otstavkadaǵy polkovnık Dáýlet Kásenov jazýshy Qalıhan Ysqaqtyń buryn-sońdy jaryqqa shyǵa qoımaǵan fotosyn kórsetken. О́ziniń jeke qorynda saqtap kelgen eken. Sýrette ádebıettiń qara nary Qalıhan Ysqaq týǵan aýyly Topqaıyńnyń ór jaǵynda jýrnalıske suhbat berip otyr. Arǵy jaǵyndaǵy Qońqaı taýy da kózge ottaı basyldy.
– 1992 jyly Topqaıyńda túsirilgen foto. Úıdegi eski albomdardyń arasynda jatqan. Suhbat alyp otyrǵan telejýrnalıst Sanııazbek Nuǵymanov, – dedi jany rýhanııatqa jaqyn D.Kásenov.
Internet dáýiri emes pe, jazýshy men jýrnalıstiń osydan otyz jyldaı buryn túsirilgen aq-qara fotosyn áleýmettik jelige júkteı qoıǵanmyn. Sálden soń Qalıhan Ysqaqtan sol zamanda suhbat alyp otyrǵan telejýrnalıst Sanııazbek Nuǵymanov habarlasty:
– Osy fotony izdep tappaı qoıyp edim, qaıdan taýyp aldyń? – dedi balasha qýanyp. – Ol kezdegi suhbat basqasha boldy-aý deımin... Esimde qalǵany: «Aǵa, demalysyńyzda nege sheteldiń tamashasyn kórmedińiz?» degenime: «Áı baýyrym-aı, ár kimniń týǵan jeri – Mysyr shahary emes pe?! Al Katon men úshin jer betindegi – jumaq», degen edi. Efırge shyqqanda, syrly suhbat bolǵan sekildi edi. Odan beri otyz jyl ótti. Umytyp ta qalyppyn, – dedi ardager telejýrnalıst Sanııazbek Nuǵymanov.
Aıtýynsha, sol joly ardager jýrnalıst Katonqaraǵaıda buǵy sharýashylyǵynan da reportaj jasaǵan eken. Jol-jónekeı Topqaıyńǵa burylyp, Qalıhan Ysqaqpen áńgimelesipti. Qaıta oralmaıtyn sol bir sátti operatory fotoǵa tartyp alǵan. «Bir sát jáne búkil ǵumyr» degen osy shyǵar.
Shyǵys Qazaqstan oblysy
