Ákeli-balaly Zakýsılovtar – «Svobodnoe» jáne «Maksımovka» seriktestikteriniń basshylary. Aýdannyń tolaıym tabys jóninde úzeńgi qaǵystyryp, tasy órge domalap turǵan sharýashylyqtary da osy. Igilikti isteri kópke tanymal. Tanymal etken qasıet – jomarttyqtary. Olar jyl saıyn aýyl turǵyndarynyń áleýmettik-turmystyq jaǵdaıynyń jaqsarýyna kómektesip keledi. Ásirese balalarǵa degen yqylasy tipti erekshe.
Ákesi Aleksandr Zakýsılovqa ulttyq qoǵamdyq «Altyn júrek» qaıyrymdylyq syılyǵynyń berilýi tegin emes. Shyntýaıtynda bul qyrýar ıgilikti istiń izetpen kómkerilip, iltıpatpen ádiptelgen qarymtasy. Olar oblysty bylaı qoıǵanda, elimizdegi shaǵyn balalar ortalyqtaryn salýdyń bastaýynda turdy. Jergilikti ult tilin oqytatyn kabıneti bar alǵashqy tegin balalar baqshasy osy Maksımovka mektebinde ashyldy. Sharýashylyq dırektory Qazaqstandy meken etetin ár turǵynnyń memlekettik tildi bilý kerektigin udaıy aıtyp júredi. Aıtyp qana qoımaı, naqty isimen dáleldeýde. Jas erekshelikterine baılanysty eresekterdiń jaǵdaıy kele bermese, balalardyń bári elge degen qurmetterin kórsetip, tildi oqyp úırenýi qajet dep esepteıdi.
Aleksandr Aleksandrovıch mádenı jáne gýmanıtarlyq salalarda qaıyrymdylyq pen demeýshilik qyzmeti úshin Qazaqstan Respýblıkasy Tuńǵysh Prezıdentiniń Qurmet dıplomynyń ıegeri. Jyl saıyn áleýmettik salaǵa mol qarjy baǵyttap, oıǵa alǵan isi ońynan oralýda. Naqtylap aıtatyn bolsaq, sharýashylyq jergilikti mektepke, mádenıet úıine, ýchaskelik polısııa pýnktine, dárigerlik ambýlatorııaǵa únemi kómek kórsetip otyrady. Bul búgin ǵana atqarylyp jatqan sharýa emes, qaıyrymdylyq jasaý qanyna bitken qaǵilez basshy 2008 jyldyń ózinde ýchaskelik dárigerge turmysqa qolaıly páterdiń kiltin tapsyrǵan bolatyn. Shartta páteraqy tólenbeıtindigi, on jyldan keıin satyp alý arqyly jekeshelendirýge bolatyny taıǵa tańba basqandaı kórsetilgen. Keıin solaı boldy da.
Turǵyndar úshin tutastaı kósheler salynyp jatqan aýyldy kóp kóre qoımaısyz. Al biz turmysyn tilge tıek etip otyrǵan Maksımovka eldi mekeninde solaı. Munda qos páterli, turmysqa qolaıly, keń de jaryq, ártúrli arhıtektýralyq pishindegi úılerden turatyn tutas kósheler bar. Bul kóshelerdi jergilikti turǵyndar ózara «rýblevka» dep ataıdy eken. Turǵyndary – eńbek ardagerleri, qarapaıym jumysshylar, «Dıplommen – aýylǵa!» baǵdarlamasy boıynsha jumysqa kelip, iske kirisip ketken jas mamandar, kópbalaly otbasylar. Bul kúnderi taǵy bir qos qabatty ǵımarat turǵyn úıge laıyqtalyp, qaıtadan jańǵyrtylýda. Jóndeý jumystary bitkennen keıin aýyl turǵyndarynyń ishinde jaıly baspanaǵa zárý bolyp otyrǵan birneshe otbasy qonys toıyn toılaıtyn bolady.
Alǵash karantın bastalǵan kezde halyqtyń abdyrap qalǵany da shyndyq. Buryn-sońdy kóz kórip, qulaq estimegen daýasyz derttiń dúbiri el apshysyn qýyryp-aq tastady. Mine, osy kezde seriktestik basshylary aýyldastaryn qamqorlyqtaryna alyp, janashyrlyq isterin údete tústi. Aýylda monsha, kir jýý kesheni, naýbaıhana úzilissiz jumys istep tur. Aıtpaqshy, bir bólke nannyń baǵasy nebári 40 teńge ekenin aıta ketelik.
Seriktestik dırektory, kishi Zakýsılov ta áke úlgisin ónege etken azamat. Qat-qabat sharýasyn jipke tizgendeı etip sanap shyǵýdyń ózi qıyn. Bir ǵana isin aıtaıyqshy, mysaly, seriktestik taıaýda jabyq hokkeı kortyn salyp berdi. Jalpy alańy 1,7 gektar, uzyndyǵy 57, eni 27 metr. Bul kontınentaldy hokkeı lıgasynyń standarttaryna tolyq jaýap beretin oryn. Korttyń qurylysyna seriktestikten 140 mln teńge qarajat bólinip otyr. Bul jerden kóshe trenajerlerine, «jasandy jamylǵysy» bar fýtbol alańyna da oryn tabylǵan. Kórki kóztartarlyq keshendi jasyl saıabaq kómkerip tur. Osy isimen-aq týǵan jerin túletýge aıanbaı úles qosyp júrgen jomart jandy, ákeli-balaly Zakýsılovtardyń qamqorlyq kókjıeginiń kórikti ekendigin dáleldep turǵanyn qapysyz ańǵarasyz.
Karantın kezinde seriktestik óz jumysshylaryn ǵana emes, tóńirektegi qamqorlyqqa zárý adamdardy da elep-eskerip, júzdegen azyq-túlik sebetin taratty. Medısınalyq qorǵanys quraldaryn satyp áperdi. Osyndaǵy feldsherlik-akýsherlik pýnkttiń bar keregin túgendedi.
– Dál osyndaı ýaqytta halyqtyń densaýlyǵyna barynsha qamqor bolýymyz kerek, – deıdi Aleksandr Zakýsılov, – jergilikti jurt «birinshi baılyq – densaýlyq» deıdi. Biz ózimiz de qansha saqtansaq ta, bir aýnap turdyq. Aýrýdyń ne ekenin kórdik. Basqa jurttyń basyna bermesin. Ras, densaýlyqty satyp alyp bere almaımyz, qalǵany qoldan keletin sharýa. Osy jerdiń jomart peıilimen yryzdyq jınap otyrǵan soń elmen bólispese bola ma?
Aýyl qazir qobaljıtyn emes, bas aýyryp, baltyr syzdasa, janashyrlary janynan tabylady. Qamqorshyńnyń qasyńda bolǵany qandaı jaqsy!
Aqmola oblysy,
Sandyqtaý aýdany
