Aptap ystyq ózbekterdi alqymnan alyp barady. Sınoptıkterdiń aıtýynsha, О́zbekstannyń birqatar oblysynda synap baǵanasy 43 gradýsqa deıin jetip otyr. Naqtyraq aıtar bolsaq, Qaraqalpaqstan Respýblıkasynda, Horezm, Naýaı jáne Buqara óńirlerinde kún qatty ysyp, rekordtyq kórsetkishke jetken. О́te ystyq aýa temperatýrasy О́zbekstan aýmaǵynda áli bir aptadaı saqtalady.
Mamandardyń málimdeýinshe, buryn mundaı jaǵdaı 1933 jyly tirkelgen. Qazir Tashkenttegi metro vagondarynyń jyldamdyǵyna da shekteý qoıyldy.
«Maýsymnyń 3 men 6 aralyǵynda Iran aýmaǵynan kelgen ystyq aýanyń saldarynan kún ysıdy dep kútiledi. Bul kúnderi aýa temperatýrasy klımattyq normadan 70 paıyzǵa deıin artady. Iаǵnı kúndiz synap baǵanasy 40-43 gradýsty kórsetedi. Al shóldi aımaqtarda aýa temperatýrasy 45 gradýsqa deıin kóteriledi», deıdi gıdrometeorologııalyq qyzmet ortalyǵynyń jetekshi mamany Oksana Kenjaeva.
