Shaǵyn granttar konkýrsynyń qorytyndysy boıynsha elimizdiń 20 ÚEU áleýmettik-kásipkerlik ıdeıalardy iske asyrýǵa 500 myń teńgeden granttar utyp aldy.
Konkýrs jeńimpazdarynyń biri – Aqmola oblysynyń Atbasar qalasynan qatysqan «Angel» qoǵamdyq birlestigi. Olar «Biz ekosómkeler tigemiz» jobasyn iske asyratyn bolady.
«Bizdiń qyzmet baǵyttarymyzdyń biri – ekologııa. Birneshe jyl boıy biz Atbasar qalasynda ekologııalyq volonterlik qozǵalysyn damyta otyryp, oqýshylar men jastardy jumysqa tarttyq. Osylaısha, polıetılen paketterden bas tartý boıynsha belsendi naýqan júrgizip kelemiz», deıdi «Angel» qoǵamdyq birlestiginiń ókilderi.
Úkimettik emes uıymdar 20 jyldan astam ýaqyt jumys istep keledi. Olardyń qatysýymen kóptegen áleýmettik joba iske asyryldy, jergilikti qoǵamdastyqtyń birqatar problemasy sheshildi. Biraq ÚEU qyzmetiniń turaqtylyǵy tek jobalardyń bolýyna jáne uıym músheleriniń úlesine ǵana emes, sonymen qatar turaqty qarjylandyrýǵa da baılanysty. Sondyqtan uıym óz bazasynda áleýmettik kásiporyndy damytý týraly oılana bastady.
Atbasarlyq qoǵamdyq uıymdar ókilderiniń aıtýynsha, munda ónerkásip joq, jumyssyzdyq deńgeıi joǵary. Dese de kentte kolledj bar, onda qyzdardy shashtaraz, aspaz, tiginshi mamandyqtaryna oqytady. Alaıda qolynda dıplomy bar qyzdardyń kópshiligi jumyssyzdar qataryn toltyrýda. О́ıtkeni bastapqy kapıtalsyz óz bıznesin bastaý jáne tájirıbe jınaý qıyn, al tájirıbesiz klıenttik bazany jınaý jáne tabysty bolý ońaı emes.
Áleýmettik-kásipkerlik bastamalardy iske asyrý sheńberinde uıymdastyrýshylar qyzdarǵa tigin tájirıbesin alýdy jáne óndiristik praktıka sheńberinde ekosómkelerdi tigý boıynsha tigin sheberhanasynda tabys tabýdy usynady, onda kásiptik baǵdar berýden basqa, kóshbasshylyq qasıetterdi damytýǵa kóńil bólinedi. Al ekosómkelerdi tigý arqyly joba taǵy bir mańyzdy mindet – polıetılen paketterdi qoldanystan azaıtý arqyly qorshaǵan ortanyń lastanýyn azaıtýǵa úles qosý bolmaq.
«Egemen-aqparat»
