Bul ıgi bastamaǵa Elbasy Nursultan Nazarbaev qoldaý bildirip, Taraz qalasynda ótken alǵashqy túlekter forýmyna qatysýshylarǵa quttyqtaý joldaǵan bolatyn. Ony Tuńǵysh Prezıdent – Elbasy Keńsesiniń basshysy Mahmut Qasymbekov jetkizip, jerlesterine júrekjardy lebizin arnaǵan bolatyn.
Oblys ákimi Berdibek Saparbaevtyń bastamasymen qolǵa alynǵan atalǵan joba qazirgi kezde aımaqtyń barlyq aýdanynda iske asyrylý ústinde.
Shý aýdanynda ótken «Jomart túlek» forýmynda da Mahmut Qasymbekov týǵan óńiriniń órkendeýine tilektestigin bildirgen edi. О́zi bilim alǵan Shý qalasyndaǵy S.Seıfýllın atyndaǵy mekteppen uzaq jyldardan beri tyǵyz baılanys ornatyp kele jatqan Mahmut Bazarqululy aýdanǵa óziniń jáne Nursultan Nazarbaev Qory men Nur Otan partııasynyń atynan kádesyı retinde sálemdemeler joldanatynyn habarlaǵan bolatyn. Sonymen qatar S.Seıfýllın atyndaǵy mektepti 1969 jyly bitirgen túlekterdiń atynan jaǵdaıy tómen otbasynan shyqqanymen, oqý úlgerimi joǵary eki oqýshyǵa L.N.Gýmılev atyndaǵy Eýrazııa ulttyq ýnıversıtetinde ózderi qalaǵan kez kelgen mamandyqta bilim alýǵa múmkindik beretin grant taǵaıyndaıtyndyǵyn jetkizdi.
Jýyrda Tuńǵysh Prezıdent – Elbasy Keńsesiniń qyzmetkeri Sanjar Álıev Shý aýdanyna arnaıy kelip, D.Qonaev aýyldyq okrýginde ornalasqan Tóle bı atyndaǵy orta mektepte ótken jıynǵa qatysty. Ol óz sózinde «Jomart túlek» forýmynyń óte jaqsy oılastyrylǵan ıdeıa jáne ıgi is-shara ekenin atap ótip, aýdandaǵy eriktiler men belsendi jastardy yntalandyrý úshin olarǵa arnaıy tigilgen kúrtesheler men keýdesheler tapsyrdy. Oǵan qosa, aýdandyq kitaphanaǵa kórkem ádebıet janryndaǵy jáne qoǵamdyq-saıası mazmundaǵy 500-den astam túrli kitap syılady.
Jıynda Shý aýdanynyń ákimi Nurjan Kalenderov «Jomart túlek» jobasyna alǵashqylardyń biri bolyp qosqan qomaqty úlesi úshin Mahmut Qasymbekovke alǵysyn bildirip, aýyl jastaryna kitap syılaý olardyń rýhanı baılyǵyn arttyrýǵa sep bolatynyn jáne munyń óskeleń urpaqqa da ónege bolatynyn aıtty.
