– Qazirgideı kúrdeli kezeńde jumys orny men óndiris oshaǵyn ashýdyń mańyzy zor. Sý eseptegish quraldaryn shyǵaratyn zaýyt – Mahambet aýdanynda boı túzeıtin alǵashqy óndiris orny. Ekonomıkaǵa paıdasy tıetin osyndaı jobalardy kóbeıtý aldaǵy ýaqytta da jalǵasady, – deıdi oblys ákimi Mahambet Dosmuhambetov.
Jańa zaýytta 80 adam jumyspen qamtylady. Onyń 60-tan astamy – jergilikti turǵyn. Solardyń qatarynda Sarytoǵaı aýylynyń turǵyny Azamat Sultashev ta bar. Ol buǵan deıin Teńiz kenishinde jumys istepti. Endi ózi turatyn aýylda otandyq ónim shyǵaratyn zaýyttyń ashylatynyn estip, osynda aýysypty. Munda onymen birge aýyldastary da jumys isteıdi. Bári arnaıy oqý kýrsynan ótip, erekshe zaýyttyń alǵashqy qyzmetkeri bolǵanyna qýanyp júr.
Al Guryev JShS-niń dırektory Jeńis Bekbasarovtyń aıtýynsha, bul – Qazaqstandaǵy otandyq sý eseptegish quraldaryn shyǵaratyn alǵashqy zaýyt. Qajetti shıkizattyń barlyǵy el ishinen ákelinedi. Ári ekologııalyq turǵydan qaýipsiz. Alǵashqyda zaýyt óz ónimimen kásiporyndarynyń suranysyn qamtamasyz etedi. Keıin respýblıkanyń ózge óńirlerinen túsetin tapsyrysty oryndaý josparlanypty.
– Elimizge sý eseptegish quraldary shetelden jetkiziledi. Sondaı-aq shetelden ákelingen bólshekteri qurastyrylady. Sondyqtan bul zaýyt elimiz úshin óte paıdaly óndiris orny bolatynyna senemiz. Bastapqyda zaýytta mehanıkalyq eseptegish quraldar, keıin elektrondy túrleri shyǵarylady. Munyń tıimdiligi – qurylǵynyń aı saıyn tutynylatyn sý mólsherin avtomatty túrde esepteý. Osy oraıda, muny elimizde qolǵa alynǵan aqparat tasymaldaý júıelerin sıfrlandyrýǵa septigi tıetin erekshe joba deýge bolady, – deıdi Jeńis Bekbasarov.
Zaýyt qurylysyn bastaǵan seriktestik basshylary eki kompanııamen memorandýmǵa qol qoıdy. Al zaýyt qurylysy osy jyldyń qyrkúıek aıynda aıaqtalyp, óndiristik jumysyn bastamaq.
