Búginde aımaqta kún saıyn 2,5 myńnan astam oqýshy mektepke avtobýspen baryp-kelip oqıdy. Byltyr oblys bıýdjetinen bólingen
200 mln teńgege 13 avtobýs satyp alynyp, aýyl mektepteriniń ıgiligine berilgen edi.
– Bıyl balalardy mektepke tasymaldaýdyń qaýipsiz ári jaıly bolýyn qamtamasyz etý maqsatynda taǵy 17 jańa avtobýs satyp alyp otyrmyz. Nur Otan partııasynyń «О́zgeris joly: árkimge laıyqty ómir!» saılaýaldy baǵdarlamasyn iske asyrý barysynda 2025 jylǵa deıin 407 aýyl mektebin jańǵyrtý josparlanǵan, 82 mektepti jóndeý jumystary bıyldan bastap qolǵa alynatyn bolady. Munyń syrtynda, óńirde 7 jańa mektep salýdy josparlap otyrmyz. Bul baǵyttaǵy jumystar bastalyp ta ketti. Qostanaıdaǵy «Bereke» jáne «Qonaı» shaǵyn aýdandarynda eki mektep, Jitiqara qalasynda bir mektep, Qarabalyq aýdanynda eki mektep jáne Qostanaı, Áýlıekól aýdandarynda bir-birden jańa mektep salynatyn bolady. Bıyl 46 bilim mekemesine 3,6 mlrd teńgege jóndeý jumystaryn júrgizý kózdelip otyr. 10 bilim mekemesi kúrdeli jóndeýden ótetin bolady, – dedi aımaq basshysy.
Oblys ortalyǵynan shalǵaı jatqan Qamysty aýdanyna qarasty Jaıylma, Qamysty jáne Altynsarın orta mektepterindegi ınternattarda jatyp oqıtyn balalar sol mańaıdaǵy mektebi joq aýyldardan keledi. Oblys ákiminiń qolynan 22 oryndyq avtobýstyń kiltin alǵan aýdandyq bilim bóliminiń basshysy Talǵat Qýanyshbaev jańa kólikti Altynsarın orta mektebiniń janyndaǵy ınternatqa tapsyratynyn aıtty.
– Aldaǵy jańa oqý jyly Altynsarın aýylynyń mańaıyndaǵy shaǵyn eldi mekenderde turatyn balalar ınternatta jatyp bilim alatyn bolady. 70 shaqyrym jerdegi Aralkól aýylynan 15 bala, Mamyrkólden birneshe oqýshy bar. Olardy mektepke osy avtobýspen tasıtyn bolamyz, – dedi bilim bóliminiń basshysy.
