Álemdegi qalyptasqan ahýaldy eskersek, ekonomıkalyq ózara is-qımyl prosesteri sıfrly platformalardyń, aqparattyq aǵyndar men derekqorlardyń biriktirilýin talap etetini belgili. Osy oraıda vedomstvo basshysy armenııalyq áriptesterine elektrondy saýda baǵytynda birlesken jobalardy júzege asyrýdy usyndy.
«Sıfrlandyrý kez kelgen memlekettiń ekonomıkalyq tabysynyń ajyramas bóligine aınalǵanyn eskerip, bul oraıda birlesken jobalardy iske asyrýdy usynamyz. Biz «áleýmettik ámııan» jobasyn engizýge baılanysty sáıkestikti baǵalaý, tutynýshylardyń quqyqtaryn qorǵaý salasynda sýbektilerdi elektrondy akkredıtteýge qatysty jaqsy jetistikterge qol jetkizdik», dedi B.Sultanov.
Mınıstr Qap taýynyń ókilderine eGov úkimettik platformasy arqyly aýqymdy joba iske asyrylyp jatqanyn, sondaı-aq atalǵan salada mınıstrliktiń oń tájirıbesi bar ekenin jetkizdi. Buǵan qosa qazaqstandyq tarap armenııalyqtarmen saýda salasynyń basqa da baǵyttarynda birlesip jumys isteýge daıyn ekenderin aıtty.
«Bizde tereń dıfferensııalanǵan saýda qurylymy qalyptasqan. Taýarlar nomenklatýrasyn keńeıtýge qatysty bar kúsh-jigerimizdi salyp kelemiz. Qazaqstandyq kompanııalar 230,9 mln dollarǵa túrli óńdelgen 50 taýardy jetkizý boıynsha eksport nomenklatýrasyn keńeıtýge daıyn. Ol munaı-hımııa (138,8 mln dollar), metallýrgııa (23,1 mln dollar), tamaq ónerkásibi (36,4 mln dollar) jáne taǵy da basqa salalardy qamtıdy», dedi Saýda mınıstri.
B.Sultanov aıtqandaı, Kazakh Export armenııalyq kompanııalarǵa saýda salasynda uzaqmerzimdi qarjylandyrý men saýda jetkizilimderin saqtandyrýǵa qatysty qoldaý kórsetý múmkindikterine ıe.
«Bul kompanııanyń qyzmetterin TMD elderindegi áriptesterimiz keńinen paıdalanyp júr. Qosylǵan quny joǵary taýarlar saýdasynyń jaqsy mysaly retinde «Qaınar AKB» kompanııasynyń elektr akkýmýlıatorlary saýdasyn aıtýǵa bolady. Aıtalyq, kompanııa koronavırýs pandemııasyna deıin 2016-2019 jyldar aralyǵynda akkýmýlıatorlardyń saýda jetkizilimin 6,4 myńnan 14 myńǵa deıin arttyrýǵa múmkindik aldy. Sol sekildi Alageum Electric kompanııalar tobynyń elektr transformatorlarynyń eksport kólemi de turaqty deńgeıdi saqtap tur», dedi vedomstvo basshysy.
Budan bólek taraptar kólik-logıstıka salasynda yntymaqtastyq ornatyp, eki jaqty alys-beristi nyǵaıtatyn jobalardy qarastyrýǵa nıetti ekenderin jetkizdi.
