Bıyl jelaıaq ofıser Jezqazǵan – Jańaarqa baǵyty boıynsha 320 shaqyrymdy 44 saǵat
59 mınýt jáne 13 sekýndta júgirip ótti. Ýltramarafondy ol 27 mamyrda Jezqazǵan qalasynan bastap, arada eki kún ótkende óziniń týǵan jeri Jańaarqa aýdanynda josparlanǵan ýaqyttan úsh saǵat buryn aıaqtady. Aıta ketetin bir jaıt, júgirý navıgasııalyq platformanyń kómegimen qadaǵalandy.
Zańǵar Álkenovtiń bul jetistigi Qazaqstannyń «Rekordtar kitabyna» engiziletin bolady. Bul týrasynda atalǵan uıymnyń ókili Baqytjan Tastúlekov málimdedi. «Ýltramarafonshynyń rekordy kitapqa 2021 jyldyń qarasha aıynda engiziletin bolady», dep atap ótti ol.
Tózimdilik pen tabandylyqtyń eren úlgisin tanytqan qaısar azamatqa jerlesteri laıyqty syı-qurmet kórsetti. Tipti, demeýshilerdiń oǵan Hyundai Accent avtokóligin tartý etkenin de aıta ketken lázim.
– Bárinen buryn jerlesterimniń qarsy alǵany, olardyń meniń jetistigime qýanǵany qatty áser etti. Men úshin ár marafon – myqtylyǵymdy tekserýdiń tóte joly. Árıne, bul jolǵy júgirý maǵan ońaıǵa túsken joq. Ásirese sońǵy kúni qatty ystyq bolyp, júgirýdi qıyndatyp jiberdi. Degenmen, maqsatyma jetip, qashyqtyqty merziminen buryn aıaqtaǵanyma qýanyshtymyn, – deıdi Z.Álkenov.
Ýltramarafonshynyń aldaǵy jospary da aýqymdy. Densaýlyq pen daıyndyq oıdaǵydaı bolsa, ol kelesi jyly Qaraǵandy men Almaty arasyn júgirip ótpekshi.
Zańǵar Álkenov kezinde boz kilemniń shańyn qaqqan balýan boldy. Ol qazaq kúresinen sport sheberi, dzıýdodan sport sheberliginen úmitker. Osydan toǵyz jyl buryn jaraqat alýyna baılanysty kilemmen qoshtasty da, kúresti ýltramarafonǵa, ıaǵnı uzaq qashyqtyqqa júgirýge aıyrbastaǵan.
