Otandastarymyzdyń arasynan Roman Starchenko eń kóp gol soqty. О́skemen hokkeı mektebiniń túlegi jeti kezdesýde qarsylastar qaqpasyna úsh shaıba engizip, tórt ret ońtaıly pas berdi. Nátıjesinde ol 7 upaı jıdy.
Qaraǵandy oblysyna qarasty Sátbaev qalasynyń týmasy Nıkıta Mıhaılıs te úsh goldyń avtory atansa, kanadalyq legıoner Kertıs Volktyń keremet pastarynan keıin bizdiń oıynshylar tórt márte mergendik tanytty.
Qorǵaýshylar arasynda eń úzdik kórsetkish Vıktor Svedbergke tıesili. Shvesııadan kelgen saıypqyran alty oıynda 4 upaıǵa (1 gol+3 pas) ıelik etti.
Álıhan Ásetov eń paıdaly oıynshylardyń tiziminiń aldyńǵy leginen kórindi. Álemdik dodaǵa qandasymyzdyń óneri +3 degen baǵaǵa ıe boldy.
Artıom Lıhotnıkov qarsylastar qaqpasyna tórt soqqy baǵyttap, sonyń ekeýinde shaıba tordan tabyldy.
Darren Dıs ár match barysynda 26 mınýt 16 sekýnd boıy muz aıdynynda oıqastady. Sondaı-aq, ol jeti kezdesýde 27 soqqy jasady. Biraq olardyń birde-bireýi nátıjeli bolmady.
Qaqpashy Nıkıta Boıarkın alty oıynda orta eseppen 2,27 shaıba jiberip aldy. Ol óz qaqpasyna baǵyttalǵan soqqylardyń 92,93 paıyzyna tosqaýyl qoıa bildi.
Al jarystyń ózine keler bolsaq, ol áli jalǵasýda. Búgin Shveısarııa men Germanııa, AQSh pen Slovakııa, Reseı men Kanada jáne Fınlıandııa men Chehııa quramalary arasynda shırek fınaldyq saıystar ótedi.
