stopfake.kz saıtynyń jazýynsha, bul aqparat – feık. Bul teorııa jeliniń aǵylshyn tildi segmentinde shyqqan. @al_janabi atty paıdalanýshy óziniń TikTok-tegi paraqshasynda aınalasyndaǵy qurylǵylardyń barlyǵy onyń Bluetooth sıgnalyna qosylýǵa tyrysatyny týraly vıdeo jarııalaǵan.
Vıdeo avtorynyń aıtýynsha, buǵan deıin ol Astra-Zeneca vaksınasyn saldyrǵan. Túpnusqa vıdeo keıinnen óshirildi, biraq ol basqa áleýmettik jelilerde taratyla bastady.
«Shyn máninde, vıdeoda sıpattalǵan «janama áserdiń» bolýy múmkin emes. Bluetooth radıojıilikti qabyldaǵyshy 2,4 gıgagerstiń ortalyq jıiligimen lısenzııalanbaǵan ISM dıapazonynda jumys isteıdi. Mıkrotolqyndar men Wi-Fi da osyndaı dıapazonda jumys isteıdi. Bluetooth sıgnaldaryn qabyldaý úshin tolqyn uzyndyǵyna eseli antenna qajet. Bluetooth tehnologııasy jaǵdaıynda bul mán shamamen 31 mm quraıdy. Mundaı kólemdegi zat vaksına ampýlalarynda kórinip turatyn edi. Vaksınasy bar qutynyń ishinde bógde zattardyń anyqtalǵany týraly habarlanǵan joq. Vaksınalar quramyna kiretin ıngredıentter tiziminde antennalar týraly eshteńe aıtylmaǵan. Demek, vaksınany saldyrý arqyly Bluetooth sıgnaldaryn taratý jáne qabyldaý múmkin emes. Immýndaýǵa arnalǵan preparattarda muny isteı alatyn qurylǵylar joq», dep qorytyndy shyǵarylǵan saıtty.
stopfake.kz osyǵan uqsas feık-aqparatty da joqqa shyǵarǵan bolatyn. Ol kezde paıdalanýshylar ózderiniń mobıldi telefondaryna shyǵyp turǵan MAC-kodtardy vaksınasııalanǵan adamdardyń jeke kody dep oılaǵan edi.
