Pılottyq joba boıynsha elimizde bótelkelerdi qaıta óńdeýge qabyldaıtyn ekinshi avtomat ornatyldy. Alǵashqy fandomat bir aı buryn Almatydaǵy «Dostyq Plaza» saýda úıinde ornatylǵan bolatyn. Sharaǵa Ekologııa jáne tabıǵatty qorǵaý mınıstri Maǵzum Myrzaǵalıev qatysty.
Mınıstrdiń málimdeýinshe, osyndaı fondamattar elimizdegi tek iri qalalarda ǵana emes óńirlerge de kóptep qoıylady.
«Jyl sońyna deıin elimizde bótelkelerdi qaıta óńdeýge qabyldaıtyn 1,5 myń fandomat ornatylatyn bolady. Sondaı-aq tek saýda ortalyqtarynda ǵana emes ashyq alańdarǵa da qoıylady. Bul fandomattardyń basty maqsaty izdiń ekologııalyq ahýaldy jaqsartý, ıaǵnı plastık ónimderdi aınalymǵa engizý. Bul bastamaǵa mınıstrlikten de qoldaý kórsetiletin bolady», deıdi mınıstr.
«Ecoplatform» jobasynyń jetekshisi Ádilet Nurselenov fandomattyń halyqqa paıdasy jóninde aıtyp ketti.
«Atalǵan fandomattar plastık jáne alıýmınıı ónimderdi suryptap, qaldyqtaryn jınaýdyń jaqsy bir sheshimi. Bul bokstar Reseıdiń «Ecoplatform» kompanııasynyń ónimi, biz atalǵan kompanııanyń Qazaqstandaǵy ókilimiz. Bir fandomattyń quny orta eseppen – 2,5 mln-dy quraıdy. Bir avtomat shamamen 700-deı bótelkeni jınaı alady. Qazirgi tańda avtomattar elimizdegi eki iri megapolıste ornatyldy, aldaǵy ýaqytta Shymkentke jáne basqa da óńirlerge qoıý josparda bar», dep málimdedi joba jetekshisi.
Aıta keteıik, jınalǵan bótelkeler Shymkenttegi qaıta óńdeý zaýytynda iriktelip, qaıta ónim shyǵarady.
