Kelýshilerdi kim tekserip jatyr?
Bul mobıldi qosymshanyń azamattardyń mártebesin qyzyl, sary, kók, jasylǵa bólýge tıisti tehnologııalyq qyzmetine kóńil kónshı bermeıtin kezder az bolmaıdy. Búginde Ashyq baǵdarlamasy mınıstrliktiń qaramaǵyna ótip, ony «Ulttyq aqparattyq tehnologııalar» AQ súıemeldeıdi. Demek atalǵan baǵdarlama tolyqtaı memlekettiń qolyna ótti. Mınıstrdiń aıtýynsha, qosymshanyń qaýipsizdik jáne basqa da tehnologııalyq máselesine «Ulttyq aqparattyq tehnologııalar» AQ jaýap beredi. Vedomstvo basshysy qazir Ashyq-tyń qyzmetteri eGov mobile qosymshasyna engizilgenin jetkizdi.
«Iаǵnı eGov mobile qosymshasy bar azamattar Ashyq baǵdarlamasyn júktemeı-aq, onyń kómegimen Ashyq-ty paıdalana alady. Ekinshiden, kópshiliktiń suranysyna sáıkes biz mýltıplatformalyq baǵytta jumys isteıtinimizdi aıtqan edik. Sondyqtan Kaspi.kz qosymshasynda da Ashyq qoljetimdi. Osy baǵytta Halyk Bank-pen de jumys istep jatyrmyz. Olardyń qosymshasynda da Ashyq jobasyn paıdalanýdyń múmkindikteri qarastyrylady. Basqa qarjy ınstıtýttary men kásipkerler osyǵan baılanysty óz usynystaryn aıtyp jatyr. Tutastaı aıtqanda, qazir 10 myńǵa jýyq bıznes sýbektisi Ashyq arqyly óz qyzmetterin jalǵastyryp, ekonomıkaǵa óz paıdasyn ákelip jatyr. Bul kúnine 100 myńnan astam adam QR kodty skanerleý arqyly túrli qyzmetti paıdalanyp jatqanyn ańǵartady. Munyń ózi úlken jetistik dep oılaımyz. О́ıtkeni kóptegen kásipkerlik sýbektisi jumystaryn júrgize almaı jatqany bizge málim. Qazir osy pandemııaǵa qaramastan atalǵan baǵdarlama arqyly isker azamattar óz kásibin jalǵastyrýǵa múmkindik alyp otyr», dedi B.Mýsın.
2 mln adam elektrondy qosymshany paıdalandy
Mınıstr eGov mobile-da búginde 15 sıfrly qujatty alýǵa bolatynyn, sondaı-aq notarıýstyń qyzmetine osy qosymsha arqyly jeke kýálikti kórsetip, júginýge bolatynyn aıtty.
«Mysaly, Kaspi.kz qosymshasy arqyly eGov mobile-dy paıdalanyp, memlekettik qyzmet túrlerin alýǵa jaǵdaı jasalǵanyn aıta ketkim keledi. Qazir bul qyzmetti 2 mln-nan asa adam paıdalanǵanyn kórip otyrmyz. Sondyqtan osy sıfrly qujatty alý tetigin damytý úshin qazir basqa da memlekettik organdarmen jumys istep, aldaǵy ýaqytta olardyń da qyzmetin eGov mobile-ǵa ıntegrasııalaý josparlanýda. Aıtalyq, Nur-Sultan – Almaty baǵytyndaǵy áýe reısimen qatynap júrgen azamattar memlekettik platformany paıdalanyp, onyń tıimdiligin baıqap keledi. Osy baǵytta Indýstrııa jáne ınfraqurylymdyq damý mınıstrligimen kelisip, basqa áýe reısterine engizý qarastyrylyp jatyr», dedi Sıfrlyq damý mınıstri.
«Ulttyq aqparattyq tehnologııalar» AQ basqarma tóraǵasy Rostıslav Konıashkın aıtqandaı, bıyl 5 aıda 28 mln-nan astam memlekettik qyzmet kórsetilip, onyń shamamen 20%-y eGov mobile arqyly usynyldy. Onyń málimetine sáıkes 1 mln-nan astam azamat osy mobıldi qosymshanyń belsendi paıdalanýshysy sanalady.
«Sońǵy keısterdiń biri retinde indetke qarsy ekpe alǵan 250 myńnan astam azamattyń vaksınalaý pasportyn aıtýǵa bolady. Budan basqa, qazir Halyqqa qyzmet kórsetý ortalyqtarynda poıyz arqyly qatynaý barysynda sıfrly qujattar qabyldanyp jatyr. Joǵaryda aıtylǵandaı, áýe tasymaly boıynsha qanatqaqty joba iske qosyldy. Osy arqyly maýsymda 5 áýejaı men basqa avıakompanııalardy qamtý kózdelip otyr. Ashyq qosymshasyna toqtalsaq, onyń qaramaǵymyzǵa ótýine baılanysty qyzmetterdiń bir bóligi zamanaýı mánerge aýystyrylyp, serverlik jabdyqtaý tetigi engizildi. Bul baǵyttaǵy jumysty Densaýlyq saqtaý mınıstrligi de júrgizip, azamattardyń PTR nátıjeleri vedomstvonyń ruqsatymen qosymshaǵa joldanyp jatyr», dedi R.Konıashkın.
Kezek máselesin sheshýge ýáde etti
Taǵy bir ózekti másele, mamandandyrylǵan halyqqa qyzmet kórsetý ortalyqtaryndaǵy kezekke aldyn ala jazylýǵa baılanysty. О́ıtkeni onsyz da uzyn-sonar kezek tolastamaıtyn qyzmet kórsetý oryndaryna kirýdiń ózi muń. Al Ashyq arqyly kirý bul kezekti odan saıyn uzartyp jibere me degen qaýip joq emes. Áıtse de salalyq mınıstrlik bul tártip ózgerissiz qalatynyn, kerisinshe onyń oń tusy kóp ekenin jetkizdi.
«Bul servıs 5-7 jyl buryn engizilip, oń nátıje berdi jáne toqtatylmaıdy. Qyzmet kórsetý ortalyǵyna kelip, anyqtama alýǵa, bir mınýtqa keńes suraýǵa keletin adamdar bar. Ár ótinishke 15-30 mınýt ýaqyt belgilenedi. Eger osy 15-30 mınýtty barlyq halyqqa qyzmet kórsetý ortalyǵyna bólsek, Qazaqstannyń barlyq azamatynyń sanyna baılanysty tereze men kezek bere almaımyz. Sondyqtan Ashyq-ty qoldaný arqyly osy máseleni sheshýdiń amaly qarastyrylýda», dedi B.Mýsın.
Mınıstr elektrondy úkimetti paıdalanatyn rezıdentter anyqtamalardy daǵdylanǵan formatta ala beretinin aıtty.
Týrıstik nysandarda baılanys qashan ornatylady?
Taıaýda elimizdiń ulttyq parki men týrıstik oryndarynda bolǵan qaıǵyly jaǵdaı baılanysy nashar jerlerde dabyl habarlamasyn jiberýge múmkindik beretin arnaıy qurylǵylardy ornatýdyń ýaqyty kelgenin kórsetti. Vedomstvo basshysynyń aıtýynsha, mundaı qurylǵylardy ornatýdyń esh qıyndyǵy joq. Máseleniń barlyǵy qarajat bólýge tirelip tur.
«Ulttyq parkterde jáne týrıstik joldarda uıaly baılanys sıgnalyn taratý úshin bazalyq stansalar qajet. Bul úshin antennaly-machtalyq qondyrǵylar ornatylýy tıis. Ony ornatý asa qıyn emes. Tek sonaý shalǵaı jerge energetıkany tartý ońaı sharýa emes. Sondyqtan bul máselege baılanysty tıisti esepteýler jasalyp, Úkimetke buǵan qansha qarajat qajet ekenin jetkizemiz. Osydan keıin salaǵa jaýapty vedomstvo osyǵan qajetti aqshany tartýdyń kózin qarastyrady. Túsinesiz be, baılanys operatorlaryna dalaly aımaqtarǵa, taýly jerlerge sym tartý adam oılaǵandaı ońaı emes. Biz áli 1200 aýyldy 4G jáne taǵy basqa baılanys jelilerimen qamtyp úlgere almaı jatyrmyz. Sondyqtan týrıstik oryndarda baılanys núkteleri bolýy úshin ýákiletti organ naqty qarajat bólýi kerek. Qazir Mádenıet jáne sport mınıstrligimen birlesip, bul máseleni sheshý úshin qarajat tartý jaǵy pysyqtalyp jatyr», dedi mınıstr.
Sıfrlyq damý mınıstrliginiń aqparatyna sáıkes bir aıdyń ishinde salalyq vedomstvodan ótinimder qabyldanyp, tıisti núkteler tańdalady.
