Sońǵy aptada COVID-19-dyń 613 jaǵdaıy tirkeldi. Demek burnaǵy aptadaǵy 928 jaǵdaımen salystyrǵanda, indettiń tómendegenin baıqaýǵa bolady.
Syrqat sheńgeline ilikkendermen baılanysta bolǵan 9 adam – aýrýdy tasymaldaýshylar. Bir táýlikte 14 jasqa deıingi balalar arasynda 10 jaǵdaı kezdesip otyr. Jalpy, qaýipti indetti juqtyrýshylar arasynda Býrabaı aýdany men Kókshetaý qalasy áli de kósh bastaýda. Sondyqtan oblystyq sanıtarlyq-epıdemııalyq baqylaý departamenti barsha aqmolalyqtardy karantın talaptaryna sáıkes, qoǵamdyq oryndarda áleýmettik araqashyqtyqty, betperde rejimin qatań saqtaýǵa shaqyrady. Sebebi óńir «sary aımaqqa» ótkenimen, «qyzyl aımaqtaǵy» shekteýler alynyp tastalýy úshin 14 kún boıy oblystyń sanıtarlyq-epıdemııalyq ahýaly turaqty bolýy kerek.
Qazir mádenı-kópshilik sharalar men jıyn-toılarǵa qatań tyıym salynǵanyna qaramastan, keıbir adamdar eleı bermeıdi. «Sary aımaqtyń» sanatyna enisimen burynǵysha toı-tomalaq, qudalyq, janaza ótkizý jıilep ketti. Áýel basta da qaterli derttiń qabynýyna ózimizdiń beıqamdyǵymyz sebepker bolyp edi. Daýasyz dertke de adamdardyń eti úırenip ketetin tárizdi me, qalaı?! Qaýipti eskere bermeýdiń qateri mol ekenin kózimiz kórgenimizben, durystap kóńil bólmeıtinimiz ókinishti-aq. Adamdar kóp jınalatyn jıynnyń vırýstyq ınfeksııanyń taralýy men epıdemııalyq ahýaldyń tómendeýine ákep soqtyrýy múmkin ekenin esten shyǵaryp ala beremiz.
Aqmola oblysy
