Kelisimshartta, AQSh aýmaǵynda «MTK GLOBAL KAZAKHSTAN» uıymdastyratyn kásipqoı boks týrnırlaryn kórsetý quqyǵymen, 2023 jylǵa deıingi kelisim bar.
– 2019 jyldan beri kompanııanyń qurylǵan kezinen bastap, biz Amerıkadaǵy «ESPN+» arnasynyń tikeleı efırinde ózimizdiń bes birdeı shoý baǵdarlamamyzdy kórsettik.
Alǵashqy ret boks keshin ótkizgen kezde Qazaqstannyń astanasy – Nur-Sultanǵa aty ańyzǵa aınalǵan promoýter Bob Arým men Ulybrıtanııanyń maqtanyshy, álem chempıony Bıllı Djo Sonders keldi. Aldyńǵy kelisimshart 10 shildede Almaty qalasynda ótetin altynshy týrnırdan keıin aıaqtalý kerek bolatyn. Jańa kelisim 2023 jyldyń sońyna deıin eseptelgen.
Bul kelisim boıynsha biz Qazaqstannan «ESPN+» teledıdarlyq jelisine enetin shamamen 9 týrnırdiń uıymdastyrylatynyna kepildik beremiz. О́zimizdiń tańdaǵan strategııamyzdyń durystyǵyn dáleldeıtin jáne amerıkalyq aýdıtorıanyń Qazaqstan boksshylary men bizdiń kompanııaǵa degen úlken qyzyǵýshylyǵyn kórsetetin, yntymaqtastyǵymyzǵa óte qýanyshtymyz, – deıdi «MTK GLOBAL KAZAKHSTAN» menedjerlik kompanııasynyń prezıdenti Asqar Salyqbaev.
«MTK GLOBAL KAZAKHSTAN» kompanııasy kezekti sport sharasyn 10 shildede Almatydaǵy Balýan Sholaq atyndaǵy sport saraıynda ótkizetini týraly belgili boldy. Kásipqoı boks keshiniń basty jekpe-jeginde birinshi orta salmaqtaǵy Tursynbaı Qulahmet sharshy alańǵa shyǵyp, óz ataǵyn qorǵaıdy. Taǵy bir basty básekede sýper jeńil salmaqtaǵy shotlandııalyq boksshy Lı MakGregor óner kórsetedi. Sonymen qatar «ESPN+» efır kestesine Talǵat Shaıken, Nurtas Ajbenov jáne Sultan Zaýrbektiń qatysýymen ótetin kezdesýler de enip otyr. Sonymen qatar kardta «MTK GLOBAL KAZAKHSTAN» menedjerlik kompanııasynyń ókilderi bolyp tabylatyn basqa da bylǵary qolǵap sheberleri enip otyr Olar – Álı Baloev, Baǵdat Ýaıdaev, Raı men Rahat Seıtjanovtar, Nurbol Sultanbaı, Abaı Tólesh, Nurdos Tólebaı, Aıdos Medet, Jansaıa Rahymberdi...
Qazaqstanda kásipqoı boksty damytý jáne tanymal etý maqsatynda «MTK GLOBAL KAZAKHSTAN» «TUKESHOV BOXING PROMOTION» promoýterlik kompanııasymen birlese otyryp, Qazaqstanda 2019 jyldan beri 20-dan astam kásipqoı boks keshterin ótkizdi. Bul týrnırlerge elimizdiń barlyq aımaqtarynan jınalǵan 250-den asa bylǵary qolǵap sheberleri qatysty. Osy kezeńde, Sultan Zaýrbek, Vıktor Kotochıgov, Qamshybek Qunqabaev, Tursynbaı Qulahmet, Nurtas Ajbenov sııaqty boksshylar, Dúnıejúzilik boks keńesi (WBC) jáne Dúnıejúzilik boks uıymy (WBO) nusqalary boıynsha chempıondyq belbeýlerdi ıelendi.
Durys uıymdastyrylǵan júıeli jumys, álemdik sport qoǵamdastyǵynyń nazaryn aýdardy. Bunyń nátıjesi bolyp, tikeleı efırde Qazaqstanda ótkizilgen 5 iri týrnırdy kórsetken, amerıkanyń iri sport alyby «ESPN» kompanııasymen jasalǵan kelisim-shart.
