«Búgin sot úkimi shyqty. Sot prosesi aıaqtaldy. Meniń kelesi prosessýaldyq áreketterim apellıasııalyq shaǵym. Men odan ári kúresemin», dedi Janna Ahmetova tilshilerge bergen suhbatynda.
Buǵan deıin sotqa qatysqan 6 alqabıdiń tórteýi Mýrtýzalı Medjıdovti kinásiz dep tanyǵan edi. Sheshimge saı aıyptalýshyny sot zalynan bostandyqqa jiberdi.
Eske salaıyq, 2018 jyldyń sáýir aıynda Máskeýdiń halyqaralyq qatynastar memlekettik ınstıtýtynyń janynan jaraqaty bar 21 jastaǵy qazaqstandyq stýdent qyz tabylady. Dereý Sklıfosovsk atyndaǵy ulttyq zertteý ınstıtýtyna aýyr halde jetkiziledi. Alaıda ol kóp uzamaı qaıtys boldy. Kýágerlerdiń aıtýynsha, qaıǵyly oqıǵaǵa deıin ol ýnıversıtettiń 4-shi qabatynda Mýrtýzalı Medjıdovpen sózge kelip qalǵan.
Aıta keteıik, Mýrtýzalı Madjıdov – belgili daǵystandyq saıasatker, Daǵystan Respýblıkasy úkimetiniń burynǵy tóraǵasy, kásipker Muhtar Medjıdovtiń uly.
Alǵashqyda Tomırıstiń ólimi óz-ózine qol jumsaýǵa májbúrleý baby boıynsha tekserilgen. Keıin is kisi ólimi babyna almastyryldy. Bıyl naýryz aıynda Tomırıstiń sheshesi Prezıdent Qasym-Jomart Toqaevqa Reseı tarapyna sottyń ádiletti ótýin jáne alqabıler sotyna qysym kórsetilmeýin jetkizýdi suraǵan bolatyn.
