Departamenttiń málimetinshe, 7 maýsym kúni keshki saǵat 20.00 shamasynda Pavlodarskaıa 48 kóshesinde ornalasqan óndiristik bazasynda sement tasıtyn kólikten shıkizatty syǵyndy ydysqa aıdaý kezinde tótenshe jaǵdaı oryn alǵan. Oǵan sebep – sement tasıtyn mashınanyń shlangisi joǵary qysymǵa shydamaı, jarylǵan.
«Ekologııa departamentiniń qyzmetkerleri tótenshe jaǵdaı oryn alǵan jerge baryp, zaýyt aýmaǵynan synamalar aldy. Onyń nátıjesi aýaǵa jaıylǵan shańnyń ruqsat etilgen shoǵyrlaný normatıvterinen asyp ketkenin kórsetti. Jospardan tys tekserý júrgiziledi. Onyń nátıjesi týraly qosymsha habarlanady», dedi departamenttegiler.
Qazirgi ýaqytta, memlekettik ekologııalyq saraptamanyń 2018 jylǵy qorytyndysyn qaıtaryp alý týraly sot óndirisi júrip jatyr.
«Almaty qalasy boıynsha Ekologııa departamentiniń sotqa deıin jetkizbeı máseleni sheshý týraly haty negizinde qalanyń Jasyl ekonomıka basqarmasy memlekettik ekologııalyq saraptamanyń qorytyndysynan aıyrý (qaıtaryp alý) týraly mamandandyrylǵan aýdanaralyq ekonomıkalyq sotyna talap aryzben júgindi. 2018 jylǵy 16 qarashadaǵy «О́ndiristik baza» úshin shyǵaryndylar normatıvteri (maksımaldy ruqsat etilgen shyǵaryndylar)» jobasy boıynsha shyǵarylǵan jáne qorshaǵan ortaǵa emıssııalardyń kúshin joıý talap etiledi. Qazirgi ýaqytta sot prosesteri júrip jatyr», delingen Ekologııa departamenti taratqan habarlamada.
