– Biz oblystyń ár óńirinde ár salada eńbek ete júrip Otanǵa degen súıispenshiligimen erekshelengen, sondaı-aq óz mamandyǵy boıynsha aıtýly tabysqa qol jetkizgen elshil azamattardy kópshilikke úlgi ete bilýimiz kerek. Búgingi forýmnyń maqsaty da – osy. Sizder – ózderińizdiń adal eńbekterińiz arqyly joǵarǵy jetistikterge qol jetkizip, el táýelsizdiginiń nyǵaıýyna tamshydaı bolsa da úles qosyp júrgen naǵyz patrıot azamatsyzdar, – dedi Baqyt Esimova.
Forým jeńimpazdary bilim, ǵylym, medısına, sport, azamattyq qorǵanys, mádenıet jáne óner salasynda eńbek etip júrgen aldyńǵy qatarly mamandar arasynan tańdalyp alyndy.
Bilim jáne ǵylym salasyndaǵy jetistikteri úshin qurmetke bólenip, mereıi ústem bolǵan Qanat Esenǵulov Qostanaı qalasyndaǵy №19, №23 mektepterde matematıka páninen sabaq beredi. Byltyr pandemııanyń pármenimen balalar qashyqtan oqýǵa kóshkende, jańa jaǵdaıǵa beıimdelgen oqý baǵdarlamasy boıynsha memlekettik telejobaǵa qatysyp, «Elarna» respýblıkalyq telearnasy úshin 7 aı ishinde 37 beınesabaq daıyndaǵan.
Saltanatty jıynda belgili qostanaılyq grossmeıster, balalar jáne jasóspirimder shahmatynan el quramasynyń bas bapkeri Petr Kostenko «Sport salasyndaǵy jetistigi úshin» atalymy boıynsha marapattaldy. Sharshy taqta sheberi bıyl Tashkentte erler arasynda ótken FIDE chempıonatynyń qola júldesine ıe bolǵan.
– Patrıotızm degen uǵym – eń aldymen, ár adamnyń óz týǵan jerine degen súıispenshiligi dep oılaımyn. Jumys babymen kóbine syrtta júrsem de, Qostanaıdy únemi saǵynyp turamyn. Elimizdiń astanasy Nur-Sultan da men úshin erekshe ystyq qala. Meniń sport salasyndaǵy eń basty jetistigim áli alda dep oılaımyn. О́zim jattyqtyryp júrgen jas shahmatshylardyń ishinde bolashaǵynan úlken úmit kúttiretin daryndy balalar kóp. Basty mindet – shákirtterimniń sheberligin shyńdap, halyqaralyq jarystarǵa daıyndaý. Keleshekte olardyń arasynan álemdik týrnırlerde jeńis tuǵyrynan kórinip júrgen Jansaıa Ábdimálik sııaqty sheber shahmatshylar shyǵatynyna senemin, – dedi Petr Kostenko.
«Densaýlyq saqtaý salasyndaǵy jetistikteri úshin» atalymy boıynsha úzdik atanǵan Qaırat Begenov Qostanaı oblystyq aýrýhanasynyń júrek-qan tamyrlary bóliminde kardıohırýrg bolyp jumys isteıdi.
– 2008 jyly elordamyzdaǵy medısına akademııasyn támamdap, úsh jyldaı Kókshetaýda, odan keıin Nur-Sultan qalasynda bes jyldaı jumys istedim. 2016 jyldan beri Qostanaıǵa kelip, júrek aýrýy bar naýqastarǵa ota jasap, olardyń ómirin uzartýǵa septigimdi tıgizip kelemin. Mysaly, bizde júregi aýyratyn naýqastarǵa jasalatyn aortokoronarlyq ushtastyrý degen operasııa bar. Ádette qalypty jaǵdaıda ota jasaǵanda biz tósti kesemiz. Tósti kesken soń, naýqastyń otadan keıin qalpyna kelýi, ońalý merzimi uzaǵyraq bolady. Kem degende úsh aı ketedi. Al endi ota jasaýdyń biz engizgen jańa ádisi boıynsha, tósti kespeı, qabyrǵa aralyǵynan ótip, júrek tamyrlaryn tigip jatyrmyz. Muny endi naýqastardyń bárine birdeı jasaı beremiz dep aıtýǵa bolmaıdy. О́ıtkeni mundaı ota túrin kótere almaıtyn naýqastar bar. Qostanaıda tósti tilmeı júrekke ota jasaýdy engizgenimizge biraz ýaqyt bolyp qaldy. Bilýimshe, mundaı kúrdeli otany elimiz boıynsha ári ketse 4-5 klınıkada ǵana jasaıdy, – dedi Qaırat Begenov.
Marapattaý rásiminde Baqyt Esimova mádenıet jáne óner salasynda jetistikke jetken Rýslan Býshınskııge, «Eńbektegi jetistigi úshin» atalymy boıynsha Kúlaı Muhamedjanova men Vladımır Bondarenkoǵa, «Tarıhı-mádenı murany saqtaýǵa qosqan úlesi úshin» atalymynyń jeńimpazy Batyrlan Saǵyntaevqa, «Týǵan jerge kómek kórsetkeni úshin» atalymy boıynsha Gúlsara Jamanqulova syndy úzdikterge arnaıy syı-sııapat tartý etti.
Is-sharany uıymdastyrýshylardyń aıtýynsha, bıyl sanıtarlyq talapqa baılanysty marapattaý rásimine jeńimpazdardyń birazy shaqyrylmaı qalypty. Shalǵaı aýdandarda turatyn tańdaýlylardy jergilikti aýdan ákimderi marapattaıtyn bolady.
