El Táýelsizdiginiń 30 jyldyǵyna arnalǵan marafondy «DOS» Táýelsiz ómir ortalyǵy» múgedekter qoǵamdyq birlestigi uıymdastyrdy. Marafonnyń negizgi ıdeıasy – múmkindigi shekteýli jandardyń qalada múgedekter arbasynda, elektr moto-prıstavkalarda esh qıyndyqsyz qozǵalýy.
«Bizdiń marafon Qazaqstan Táýelsizdiginiń 30 jyldyǵyna oraılastyrylǵan. Múgedekter arbasynda otyrǵanmen úıde otyrmaıtyn jandar bar ekenin jurtshylyqqa kórsetkimiz keledi.
Qazir bizde elektr moto-prıstavkalar túrindegi qurylǵylar bar. Bul moto-prıstavkalardy bizden jalǵa alyp, elordamyzdyń ádemi jerlerin aralaı alady. Bul bir adamnyń táýelsizdigi, ıaǵnı basqalardan kómek suramaı-aq emin-erkin qozǵala alady», dedi «DOS» Táýelsiz ómir» ortalyǵy qoǵamdyq birlestiginiń atqarýshy dırektory Ardaq Otarbaev.
Marafonǵa múgedekter arbasynda 16 adam qatysty. Motojarys qozǵalysy Qabanbaı batyr dańǵyly — Qorǵaljyn tas joly — Turan dańǵyly — Ortalyq saıabaq baǵyty boıynsha ótti.
«Elimizde moto-prıstavkalar sherýin alǵash bolyp biz ótkizgen shyǵarmyz. Elordamyz osyndaı marafondarǵa jáne múgedekter arbasynda erkin júrip-turýyna alǵash bolyp múmkindik jasady», dep atap ótti Ardaq Otarbaev.
Ortalyqta atap ótkendeı, bir elektr moto-prıstavkanyń quny shamamen 300 myń teńgeni quraıdy. Qoǵamdyq birlestik ázirge Qytaıdan 10 danasyn satyp aldy, biraq bolashaqta qarjylandyrý negizinde qosymsha satyp alý josparlanýda.
Uıymdastyrýshylar bolashaqta arbamen júretin adamdardyń motojarystary jyl saıyn ótkiziletinin aıtty.
Aıta ketý kerek, marafon sanıtarlyq normalardy saqtaı otyryp jáne Nur-Sultan qalasynyń patrýldik polısııasynyń súıemeldeýimen ótti.
