«Bıylǵy jyl basyndaǵy azdaǵan turaqtanýdan keıin mamyrda ınflıasııalyq prosesterdiń jyldyq kórsetilim boıynsha 7,2%-ǵa deıin jedeldeýi baıqalady. Azyq-túlikke jatpaıtyn taýarlar men aqyly qyzmetter baǵasynyń aıtarlyqtaı ósýi azyq-túliktiń quramdas bólikteriniń dezınflıasııasymen teńestirildi. Azyq-túlik ınflıasııasy nan-toqash ónimderiniń, ettiń, jemis-kókónis ónimderiniń baǵasy ósýiniń baıaýlaýy aıasynda 9,8%-dan 9,3%-ǵa deıin báseńdedi», dedi Erbolat Dosaev Úkimet otyrysynda.
Ulttyq bank tóraǵasy dezınflıasııalyq prosesterge qaramastan, jekelegen taýar naryqtarynda qymbattaý jalǵasyp jatqanyn atap ótti.
«Kıim-keshek pen aıaq qıim baǵasynyń 5,9%-ǵa deıin, benzın baǵasynyń 12,7%-ǵa deıin ósý qarqynyna baılanysty azyq-túlikke jatpaıtyn ınflıasııa 6,4%-dan 6,7%-ǵa deıin jedeldedi. Karantındik shekteýlerdi jeńildetý jaǵdaıynda joǵarylaǵan suranys aıasynda, elektr energııasy tarıfteriniń artýy men jekelegen qyzmetter baǵasynyń ósýi aıasynda aqyly qyzmetter ınflıasııasy 4,1%-dan 5,1%-ǵa deıin jedeldedi. Benzın baǵasynyń edáýir kúrt ósýin, elektr energııasy baǵasynyń ósýin, barynsha kúshti fıskaldyq yntalandyrýdy jáne joǵary ınflıasııalyq kútýlerdi eskersek, 2021 jyldyń sońyna qaraı, bizdiń sońǵy boljamdarǵa sáıkes, ınflıasııa nysanaly dıapazonnan 0,4-0,5 paıyzdyq tarmaqqa joǵary qalyptasýy múmkin. Sonymen birge, 2022 jyly biz ishki proınflıasııalyq faktorlar áseriniń taýsylýyn jáne syrtqy ınflıasııalyq qysymnyń álsireýin kútemiz. Nátıjesinde ınflıasııa bekitilgen dáliz 4-6%-ǵa kiredi», deıdi E. Dosaev.
Atalǵandy eskerip, bıylǵy 7 maýsymda Ulttyq bank bazalyq stavkany 9% deńgeıinde saqtaýǵa sheshim qabyldaǵan. «Proınflıasııalyq faktorlar tarapynan táýekelder iske asqan jaǵdaıda jáne boljamdy baǵalaýlarmen salystyrǵanda barynsha baıaý dezınflıasııa jaǵdaıynda Ulttyq bank aqsha-kredıt sharttaryn qatańdatý boıynsha sheshim qabyldaıdy», deıdi Erbolat Dosaev.
