Chempıonattyń ashylýynda Qazaqstan dzıýdo federasııasynyń prezıdenti Qaırat Qojamjarov 2021 jyl Tokıo Olımpıadasyna baılanysty sportshylar úshin óte mańyzdy ekenin atap ótip, sportshylarǵa aldaǵy jarysta sáttilik pen jeńis tiledi.
«Sońǵy bir jarym jyl ishinde jarystarǵa, ásirese sheteldegi básekelerge qatysý qıynǵa soqty. Degenmen sońǵy ýaqytta quramamyz álemdik jarystarǵa qatysyp júr. Búgin 23 jasqa deıingi erler men áıelder arasynda el birinshiligi ótip jatyr. Jattyǵýǵa qaıta oralǵannan keıin dzıýdoshylarymyz Tokıo olımpıadasyna belsendi daıyndalýda. Jastarymyz áıgili sportshylarymyz sııaqty artylǵan úmitti aqtaıdy dep senemiz», dedi Qaırat Qojamjarov.
Aıta keteıik, dzıýdodan Qazaqstan chempıonaty 2018 jyly ótken bolatyn. Dzıýdoshylarymyz byltyr pandemııaǵa baılanysty jarysqa qatysa almady. Al bıyl chempıonat sanıtarlyq normalardy saqtaı otyryp, kórermensiz ótedi.
«23 jasqa deıingi erler men áıelderge arnalǵan dzıýdodan QR chempıonaty jyl saıyn ótkiziledi. Bul jastardyń eresekter sanatyna aýysatyn chempıonaty bolyp sanalady. Búgingi tańda jarysqa barlyq óńirden 300-den astam sportshy keldi. Daıyndyq deńgeıi jaqsy. Munda álem chempıondary da, Azııa chempıondary da qatysady. Ár óńirden ár salmaqta 2 sportshy keldi. Chempıonat byltyr da ótýi kerek edi, biraq pandemııaǵa baılanysty ótkizbeýge májbúr boldyq. Bıyl sanıtarlyq normalardy saqtaı otyryp, elordada ótkizip otyrmyz», dedi Nur-Sultan qalasy ákimdiginiń «Olımpıadalyq sport túrleri boıynsha sportty damytý dıreksııasy» KMM basshysy Baǵdat Danııarov.
60 kelige deıingi salmaq dárejesindegi birinshilik chempıondarynyń biri Jambyl oblysynyń sportshysy Ernur Súleımen boldy. Fınaldyq jekpe-jekten keıin chempıon óz áserimen bólisti.
«Búgin chempıon atanǵanym úshin jattyqtyrýshylaryma úlken alǵysymdy bildiremin. Qarsylasym menen jas bolǵanmen myqty dzıýdoshylardyń biri eken. Ony jeńýim qıyn boldy. Chempıondyq joldaǵy jekpe-jektiń bireýi de ońaı bolǵan joq. Kelesi maqsat — álem chempıony jáne Olımpıada chempıony bolý», dedi Ernur Súleımen.
